Моди Покистонни огоҳлантирди: “Навбатдаги терактга кескин жавоб берилади”
“Бу уруш даври эмас, лекин бу террор даври ҳам бўлмаслиги керак. Агар Ҳиндистонга қарши яна бир бор теракт амалга оширилса, биз шубҳасиз, қаттиқ жавоб берамиз”, — деди бош вазир Моди ўз нутқида.
Зиддият қаердан бошланди?
Ҳиндистон ва Покистон ўртасидаги тортишувлар 22 апрель куни Кашмирнинг Паҳалгам ҳудудида юз берган террорчилик актидан кейин яна авж олди. Ўшанда қуролли шахслар маҳаллий аҳоли ва сайёҳларга ўқ узиб, 26 кишининг ҳаётига зомин бўлишган. Ҳиндистон бу ҳужумда Покистонни айблади. Исламабод эса бу айбловларни рад этиб, холис текширув талаб қилди.
Иқтисодий ва дипломатик алоқалар музлаб қолди
Террорчилик ҳужумидан сўнг Ҳиндистон 1960 йилда имзоланган Ҳинд сувлар тўғрисидаги шартномани тўхтатди ва чегара бўйлаб сув оқимини узди. Покистон бу ҳаракатни уруш эълони сифатида баҳолади. Шу билан бирга, Исламабод Ҳиндистон билан барча савдо ва дипломатик алоқаларни чеклади, ҳаво майдонини ёпди.
Қўшнилар ядровий танглик остида
Чегарада қисқа масофали тўқнашувлар, ракета синовлари ва ҳаво мудофааси ҳаракатлари кўпайган бир пайтда, халқаро ҳамжамият — хусусан, АҚШ тарафларни эскалацияни олдини олишга ва дипломатик йўл билан муаммога ечим топишга чақирди.
10 май куни икки давлат қуруқлик, денгиз ва ҳавода ҳарбий ҳаракатларни тўхтатиш бўйича вақтинчалик келишувга эришди. Бироқ, бу келишувнинг барқарорлиги шубҳа остида қолмоқда: Жамму ва Кашмирнинг ёзги пойтахти Сринагарда портлашлар ва Ҳиндистоннинг ҳаво мудофааси фаолияти қайд этилди.
Эскалация хавфи ҳали ҳам мавжуд
Томонлар ядро қуролига эга эканини ҳисобга олсак, ҳар бир ҳодиса катта хавф остидаги барқарорликни ўзгартириб юбориши мумкин. Бу вазиятда АҚШ воситачилигидаги музокаралар муҳим аҳамият касб этади. Ҳозирча келишилган сулҳ тўлиқ сақланмоқда, аммо ҳар қандай хато сиёсий жараённи яна қайтиб бўлмас нуқтага олиб бориши мумкин.
Zamin.uz таҳририяти Ҳиндистон ва Покистон ўртасидаги можаронинг тинч йўл билан бартараф этилиши тарафдори сифатида, ҳар икки давлатни ақл ва дипломатияга суяниб, қурол эмас, мулоқот орқали муаммоларга ечим топишга чақириб қолади.