Раньерининг ВАРга нисбатан танқиди: “Қоидалар аниқ бўлмас экан, ВАР аралашмаслиги керак”
Ўйинда 1:1 ҳисобида бўлган пайтда ҳакам Симоне Соцца “Рома” фойдасига пенальти белгилади. Бу қарор “Аталанта” футболчиси Марио Пашаличнинг “Рома” ярим ҳимоячиси Ману Коне билан тўқнашувидан сўнг қабул қилинди. Бироқ ВАР текширувидан сўнг пенальти бекор қилинди, бу эса Раньерининг қаттиқ норозилигига сабаб бўлди.
Раньерининг фикрича, ВАР фақат аниқ ва равшан хатоларда аралашиши керак эди. Унинг таъкидлашича, Пашалич Коне билан контактга кирган ва ҳакам пенальти белгилаган бўлса, ВАР бу қарорга аралашмаслиги керак эди. У қоидаларнинг ҳар ўйинда ўзгариб боришига ҳам эътироз билдирди.
— Мен экспертлардан сўрамоқчиман: бу пенальти эди ёки йўқ? Агар бу ҳолат “60/40” бўлса, бизга айтилганди-ку, ВАР фақат аниқ ва равшан хатоларда аралашиши керак, деб.
Кўриниб турибди, Пашалич нотўғри ҳаракат қилди, оёғини тўғри қўймади ва футболчимизга (Коне) тегди. Шу сабаб, ВАР бунга аралашмаслиги керак эди. Ҳакам пенальти берган — демак, қарор ўзгармаслиги керак эди.
Қоидалар ўйиндан ўйинга ўзгаряпти, биз буни қабул қиляпмиз, лекин лигамизда яхлитлик йўқлиги хафалик уйғотади. Аниқ кўриниб турибди-ку: Пашалич Коне билан контактга кирди. Ҳакам пенальти берган экан, ВАР сукут сақлаши керак эди.
Мен “пенальти борми ёки йўқ” деб сўрамаяпман. Мен сўраяпман: ВАР тизими тиззадан ёки оёқ панжасидан бўлган контактларга аралаша оладими?
Биз қабул қиламиз, лекин спортдаги адолат учун қоидалар аниқ бўлиши керак. Улар ҳақиқатдан ҳам ўзгардими? — дея таъриф бериб ўтди италиялик мутахассис.
“Рома”нинг бу мағлубияти жамоанинг Чемпионлар лигасига чиқиш имкониятларини камайтирди. Ҳозирда жамоа 63 очко билан 6-ўринда жойлашган. Раньерининг таъкидлашича, жамоа охиригача курашишда давом этади.
“Аталанта” эса бу ғалаба орқали 71 очко билан 3-ўринга кўтарилди ва Чемпионлар лигасига чиқишни кафолатлади.
Бу баҳсли қарор ва Раньерининг танқиди Италия футболида ВАР тизимининг қўлланилиши ва қоидаларнинг аниқлиги борасидаги муҳокамаларни янада кучайтириши мумкин.