Ҳиндистон бош вазири: "Навбатдаги хато Покистонни харитадан ўчириши мумкин"
"Синдур" операцияси ва эҳтимолий давоми
Моди нутқида 7 май куни амалга оширилган "Синдур" ҳарбий операцияси фақат тўхтатилганини, якунланмаганини ва Ҳиндистон ҳар қандай пайтда уни қайта бошлашга тайёр эканини таъкидлади. Унинг таъкидлашича, террорчилик хуружларига нисбатан кескин жавоб қайтарилади ва бугунги танаффус Покистоннинг кейинги қадамларини баҳолаш учун бериладиган вақт, холос.
"Биз террорчилар ва уларни қўллаб-қувватлаётган ҳарбий базаларга қарши жавоб чораларини фақат вақтинча тўхтатдик. Агар янги ҳужум бўлса, жавобимиз кескин ва ҳал қилувчи бўлади", деди Моди.
Хавфсизлик тўғрисида огоҳлантириш
Ҳиндистон ҳаво маршали Авадеш Кумар Бҳарти ҳам матбуот анжуманида мамлакат ҳарбийлари ҳар қандай вазиятга жавоб беришга тайёр эканини билдирди. Унинг таъкидлашича, барча ҳарбий инфратузилмалар юқори даражада тайёр ҳолатга келтирилган.
Музокаралар фақат Кашмир ва терроризм ҳақида
Моди ўз мурожаатида Ҳиндистоннинг позициясини очиқ баён қилди: "Ҳиндистон ва Покистон ўртасидаги ҳар қандай музокара фақат икки масалада бўлади — терроризм ва Кашмир. Савдо ва тинчлик параллел олиб борилиши мумкин эмас."
Бош вазир Покистон ҳукуматини ва армиясини террорчиликни қўллаб-қувватлашда айблаб, агар улар буни тўхтатмаса, "Покистоннинг мавжудлиги хавф остида қолиши" ҳақида огоҳлантирди.
Покистоннинг жавоби
Покистон мудофаа вазири Хаважа Асиф эса ўз чиқишида Покистонни терроризм манбаи эмас, балки унинг қурбони сифатида кўрсатди. У Покистоннинг Ҳиндистон билан учта асосий масала: Кашмир, терроризм ва сув масалалари юзасидан музокара қилишга тайёрлигини маълум қилди.
Покистон Ҳиндистоннинг 2019 йилда Жамму ва Кашмир штатини тугатиб, уни иттифоқ ҳудудига айлантириш қарорини танқид қилди ва Кашмирни Ҳиндистон ишғоли деб баҳолади.
Халқаро хавотир ва келажак таҳдидлар
Қўшма Штатлар ва бошқа халқаро кучлар ҳар икки томонни зиддиятни эскалация қилмасликка, музокаралар орқали ечим излашга чақирмоқда. Ҳиндистон ва Покистон ядро қуролига эга давлатлар экани муносабати билан ҳар қандай ҳарбий тўқнашув халқаро миқёсда жиддий хавотир уйғотмоқда.
Zamin.uz таҳририяти бу инқирозда тинч ва дипломатик ечимлар устувор бўлиши керак, деб ҳисоблайди ва ҳар икки томонни ўзини тийиб туришга чақиришга қўшилади.