Тошкентда 12 млрд сўмлик ноқонуний тамаки фош этилди

Тошкент шаҳрида йирик миқдорда ноқонуний тамаки маҳсулотлари муомаласининг олди олинди. Бош прокуратура ҳузуридаги Департаментнинг шаҳар бошқармаси томонидан ўтказилган тезкор тадбир натижасида “B.S” МЧЖга қарашли савдо шохобчаларида рухсат этилмаган ҳолда электрон ва анъанавий тамаки маҳсулотлари сотилаётгани аниқланди.

Текширувлар давомида умумий баҳоси 12 миллиард сўмга яқин бўлган 144 567 қути маҳсулот ашёвий далил сифатида олинди. Улар орасида 56 225 дона электрон тамаки, 25 714 дона махсус суюқлик, 10 668 дона чекиш қурилмаси ва 3 800 дона кальян бутловчи қисмлари бор.

Тадбир доирасида қўшимча маълумотлар асосида Қибрай туманидаги “Хайдаробод” маҳалласида ноқонуний цех фаолияти фош этилди. У ерда уч нафар фуқаро инсон саломатлигига хавфли бўлган таркибдаги электрон тамаки маҳсулотларини ясалма шароитда тайёрлаш билан шуғулланиб келаётгани маълум бўлди.

Цехдан қиймати 500 миллион сўмга яқин бўлган маҳсулотлар: 2 175 дона суюқлик, катта ҳажмдаги глицерин ва гликол кислотаси, юзлаб тамаки этикеткалари, тарозилар, ўлчов идишлари, ароматизаторлар ҳамда қадоқлаш ускуналари олинди.

Ҳозирда ушбу ҳолат юзасидан Жиноят кодексининг 179-моддаси (сохта тадбиркорлик) ва 186-1-моддаси (тамаки маҳсулотини қонунга хилоф ишлаб чиқариш) бўйича иш қўзғатилиб, тергов ҳаракатлари бошланган.

Zamin.uz таҳририяти қонунбузарликка қарши бундай қатъий чораларни қўллаб-қувватлайди ва жараён ривожини кузатишда давом этади.