Дуров Telegram’да Руминия сайловига аралашиш талаби рад этилганини айтди
“Консерватив овозлар”ни блоклаш сўралган
Дуровнинг таъкидлашича, 18 май, якшанба куни Руминияда сайловларнинг иккинчи босқичи бўлиб ўтиши олдидан Ғарбий Европа ҳукуматларидан бири Telegram’дан мамлакатдаги консерватив сиёсий гуруҳлар каналларини ёпишни сўраган. Бунга жавобан у шундай деб ёзди:
“Мен бу илтимосни қатъиян рад этдим. Telegram руминиялик фойдаланувчиларнинг сўз эркинлигини чекламайди. Сиёсий каналлар блокланмайди.”
Францияга ишора?
Ҳар қанча аниқ давлат номи тилга олинмаган бўлса-да, Дуров ўз ёзувига “ўйлаб кўринг, қайси бири” деган ибора ва “багет” эмодзисини қўшган. Бу кенг доирада Францияга ишора сифатида баҳоланмоқда.
Кейинроқ Дуров шу йилнинг баҳорида Франция Ташқи разведка бош бошқармаси раҳбари Николя Лернер томонидан билдирилган таклиф — Руминиядаги консерватив овозлар тақиқланиши ҳақидаги илтимосни ҳам рад этганини ошкор қилди.
“Демократияни ҳимоя қилиш” баҳонаси танқид остида
Дуров ушбу ҳолатни фақат сўз эркинлиги нуқтаи назаридан эмас, балки сиёсий манипуляция ва иккиюзламачиликнинг очиқ намунаси сифатида баҳолади:
“Демократияни йўқ қилиш орқали уни ҳимоя қилиб бўлмайди. Сайловларга аралашиб туриб, гўёки аралашувга қарши курашаётган бўлиш — мутлақ зиддият. Сизда ё сўз эркинлиги ва адолатли сайловлар бор, ё йўқ. Руминия халқи эса ҳар иккисини ҳам муносиб кўради.”
Zamin.uz таҳририятидан:
Павел Дуровнинг бу баёноти глобал миқёсда сўз эркинлиги ва сайлов шаффофлиги учун кураш қандай мураккаб сиёсий босимлар остида кечаётганини яна бир бор очиқлаб берди. Шу билан бирга, бу ҳолат Telegram’нинг бетараф ва эркин платформа сифатидаги мавқеини янада мустаҳкамлади.