Виталий Левченко "Нефтчи"нинг ОКМК билан ўйини ҳақида нималар деди?
"Яхши ўйин бўлди. Икки жамоа ҳам бир-бирини пухта ўрганиб чиққан экан. Биринчи бўлимда рақиб ҳужумчисига кўп очиқ зоналарни тақдим этдик ва шу сабабли қийналдик. Танаффусда эса ўзгаришга қўл урдик. Дуранг адолатли натижа бўлди деб ўйлайман" - дея фикр билдирди Виталий Левченко баҳс якунлангач.
- Жамоангиз гол ўтказиб юбормагунга қадар иккинчи рақам бўлиб ўйнаётган эди. Фақатгина голдан сўнг жонланиш бўлди. "Нефтчи" бугун Олмалиққа бир очкони қўлга киритиш учун келганмиди?
- Биз ғалаба учун келгандик. Барча жамоа ғалаба қозонишни истайди. ОКМК жамоасининг кучли жиҳатларини бартараф этишга интилдик. Жорий мавсумда битта ўйинда очиқ футбол ўйнашга ҳаракат қилдик, бироқ натижа биз кутгандек бўлмаган эди. Таҳлил қилиб чиқамиз ва бир хулосага келамиз. Биз рақибнинг кучли тарафларини ҳисобга олган ҳолда ўйнаймиз. Ҳужумкор футбол намойиш этганимизда ОКМК футболчиларига очиқ зоналарни тақдим этган бўлардик. ОКМК эса бўш зоналар туфайли камбэклар қайд этиб келмоқда. Жанговар ўйин гувоҳи бўлдик.
- Жамшид Искандеров сўнгги учрашувларда 60 дақиқа ҳам ўйнамаяпти. Бунга сабаб унинг жисмоний ҳолатими ёки бу сизнинг қарорингиз?
- Биз ўйин давомида қайси футболчиларни майдонга тушириб, ўйин сифатини ошира олишимиз ҳақида ўйлаймиз. Жамоада тахминан 20та футболчи бор ва биз ротация қилишга мажбурмиз. Кимдир ўйинга қўшилиб кета олади, кимдир эса йўқ. Ғиёсовнинг тезлиги эвазига ўйинни кучайтира олардик ва шу сабабли шундай қарорга келдик.
- "Нефтчи" Ўзбекистондаги энг кучли таркибга эга, лекин шунга қарамай жамоангиз асосан ҳимояга эътибор қаратмоқда. Ўтган мавсумда "Навбаҳор" ҳам шундай юлдузли таркибга эга бўлган эди ва гол уриши билан ҳимояга ётиб олиш билан банд эди. Сизнинг жамоангиз ҳам шундай ўйнамоқда. "Навбаҳор" сценарийси такрорланишидан қўрқмайсизми?
- "Реал" юлдузли таркибга эгами? Тушунинг, фамилиялар футбол ўйнамайди, оддий инсонлар футбол ўйнашади. Қачондир мен ҳам ўз фамилиямга ва номимга эга бўлганман, аммо ҳозир майдонга тушиб ўйнаб бера олмайман. Футболда талаблар бор ва уларни бажариш керак. Журналистлар биздан ҳужумкор ўйин кутишади. Биз фақат ҳужум қилиб, 0:4 ҳисобида мағлуб бўлайлик-ми? Шунда сизлар, ҳужумкор ва чиройли футбол учун мақтайсизларми? Футбол интеллектуал ўйин. Масалан, шахмат ўйнаганингизда истаганингизча юриш қилмайсиз-ку. Стратегия орқали ўйнайсиз. Футбол ҳам шундай. Талабларга жавоб берадиган футболчилар майдонга тушишади. Юлдузли жамоалар ҳар доим ҳам натижага эришаверишмайди. Сабаби тактика, тартиб ва стратегия деган нарсалар бор.
- Агар футболда номлар роль ўйнамаса, унда нега "Нефтчи" таркиби бунчалик кучайтирилди?
- Шунчалик саволларингиз кўп-ми? Мен ушбу саволларга дарҳол жавоб бера олмайман. Барчаси учун вақт керак. ОКМК ўз таркибини неча йилдан бери ўйнатиб келмоқда. Танаффусда жамоа таркибини ўзгартирсак, ОКМКнинг ўйини қизиқарли бўлишда давом этадими? Менимча, йўқ. Бир гуруҳ футболчиларни харид қилгандан сўнг барчаси яхши бўлиб кетади деб ўйлайсизларми? Ҳар бир мураббийнинг ўз қарашлари бўлади. Жамоа ҳам оддий инсонлардан иборат. Ҳеч ким машина эмас. Қайсидир жамоада 70-80 метр ортга қайтиш талаб этилмайди, бошқасида эса бундай талаб бор. Фарқ шунда.
- "Нефтчи" мағлуб бўлаётганида Марушичнинг ўрнига Табатадзени майдонга туширдингиз. Мағлуб бўлаётган жамоа нега иккита ҳужумчи билан ўйнамади? Жамоангиз битта ҳужумчи билан ўйнашда давом этганининг сабаби нимада?
- Биз икки нафар ҳужумчи билан ўйнадик-ку.
- Искандаров ҳужумчи эмас-ку.
- У ҳужумчи вазифасини бажаради. Сиз "Барселона" ҳужумчисиз ўйнаганини кўрганмисиз? Мен сизга бир савол берай. Табатадзе ва Марушич бир хил функциядаги ўйинчилар. Уларни бир вақтда майдонга ташласак, ким ортга қайтади. Бундай жараёнларни тушуниш учун, жамоа ичида бўлиш керак. Бир футболчи тўпни қабул қилувчи ва курашувчан бўлиши керак. Иккинчиси эса ҳимоячиларни ортда қолдириши ва тўпни қабул қилиш учун очилиши талаб этилади.
Манба: championat.asia