Қазақстандықтар Құрбан айтқа орай қалай демалады?
2025 жылғы маусымда қазақстандықтарды қосымша демалыс күні күтеді. 6 маусым (жұма) – Құрбан айт мерекесіне байланысты демалыс болады, - деп хабарлайды Tengrinews.kz тілшісі.
Бұл туралы Еңбек және халықты әлеуметтік қорғау министрлігі редакция сауалына ресми жауапта мәлімдеді.
"Қазақстан мұсылмандары діни басқармасы мәліметіне сәйкес, 2025 жылы Құрбан айт мерекесі 6 маусымға сәйкес келеді. Осылайша, биылғы 6 маусым (жұма) демалыс күні болып есептеледі", – деп хабарлады министрлік.
Сонымен қатар, ведомство Құрбан айт діни мейрам болғанымен, ол мерекелік, бірақ мемлекеттік емес мерекелер қатарына кіретінін еске салды. Бұл дегеніміз – мемлекеттік мерекелердегідей демалыс күндерін ауыстыру бұл жағдайда қолданылмайды.
"Еңбек кодексінің 84-бабы 5-тармағына сәйкес, мұсылман күнтізбесіне сәйкес атап өтілетін Құрбан айттың бірінші күні демалыс күні болып саналады. Алайда ол мемлекеттік мерекелер тізіміне кірмейді", – деді министрлік.
Сондай-ақ, министрлік 2025 жылғы маусымда басқа демалыс күндерін ауыстыру жоспарланбағанын нақтылады.
Құрбан айт
Маусымда Қазақстанда мұсылмандардың маңызды мерекелерінің бірі Құрбан айт атап өтіледі. Биыл Құрбан айттың бірінші күні 6 маусымға сәйкес келеді. Сондықтан қазақстандықтар үш күн қатарынан демалады:
Аптасына бес күн жұмыс істейтіндер үшін 6, 7, 8 маусым - демалыс күндері.
Аптасына алты күн жұмыс істейтіндер үшін: 6 маусым - демалыс, 7 маусым - жұмыс күні, 8 маусым - демалыс.
ҚМДБ мәліметінше, Құрбан айт басталатын күн мамырдың соңына қарай нақты жарияланады, бір күнге ауысуы да мүмкін.
Құрбан айт қандай мереке?
Құрбан айт - мұсылмандардың ең қасиетті мерекесі. Ол ораза айттан кейін 70 күннен соң басталып, 3 күнге созылады. Бұл кезде әрбір мұсылман мүмкіндігі болса құрбан шалады, мал сояды.
Маусымда қанша күн демалыс бар?
Маусымда бес күн жұмыс істейтіндер үшін он күн демалыс бар, ал алты күн жұмыс істейтіндер үшін алты күн демалыс бар.
Сілтемесіз жаңалық оқисыз ба? Онда Telegram желісінде парақшамызға тіркеліңіз!