For sterk vind for brannhelikopter
Vinden på Bømlo er no for kraftig til at brannhelikopteret kan drive sløkkearbeid.
Fram til midnatt vil det blåse frå sterk kuling til liten storm.
– Det er per no ingen opne flammar, men det bles mykje så det er mykje folk ute i terrenget, seier vaktleiar Vivian Haugland ved 110 Sør Vest.
Tre traktorar går no skytteltrafikk og dynker området mellom brannen og busetnad med vatn.
– Førebels er det god kontroll og oversikt på brannen, men det er allereie bestemt at det skal vere folk i området til i alle fall torsdag morgon, seier ho.
Skogbrannen som i går kveld kom under kontroll, blussa opp att med fleire mindre brannar onsdag morgon.
Til no har det brunne på kring 100 mål. I 15.30-tida i ettermiddag blir det vurdert om dei 13 evakuerte får flytte heim.