Илон Маск ҳақида янги даъво: кун ора кетамин, NYT фош қилди
Газета келтирган маълумотларга кўра, Маск АҚШ президенти Доналд Трампнинг 2024 йилги президентлик сайлови учун олиб борилган сайловолди кампанияси давомида турли психотроп моддалар ва гиёҳвандлик воситаларини жуда фаол истеъмол қилган. Бу ҳақда нашрга тадбиркорнинг атрофидаги бир неча манба хабар берган.
Тадбиркор асосан кучли таъсир қилувчи модда бўлган кетаминни мунтазам равишда ва катта миқдорда қабул қилгани таъкидланади. Маск 2024 йилнинг март ойида CNN телеканалига берган интервюсида кетаминни фақат шифокор рецепти асосида, оз миқдорда ва икки ҳафтада бир марта истеъмол қилаётганини айтган бўлса-да, The New York Times газетаси унинг бу моддани кўпроқ қабул қилганини маълум қилди. Нашр манбаларига кўра, тадбиркор кетаминни тез-тез, ҳатто ҳар куни истеъмол қилган ҳамда уни бошқа турдаги гиёҳванд моддалар билан аралаштирган ҳолда ҳам қўллаган.
Таъкидланишича, миллиардер бу моддани ортиқча истеъмол қилгани сабабли соғлиғида жиддий муаммолар пайдо бўлган ва у бу ҳақда ўзининг атрофидагилар билан ҳам гаплашган. Маскнинг айтишича, доимий кетамин истеъмоли натижасида унинг қовуғида жиддий муаммолар юзага келган.
The New York Times газетаси, шунингдек, Илон Маск экстаз (MDMA) ва галлюциноген қўзиқоринлар каби бошқа психоактив моддаларни ҳам истеъмол қилганини маълум қилган. Бу билан чекланмай, тадбиркор ўзининг ёнида доим 20 та таблеткадан иборат дори қутисини олиб юрган, уларнинг орасида Аддералл каби кучли стимуляторлар ҳам бўлган.
Бундан ташқари, нашр Маскнинг АҚШ ҳукуматининг юқори лавозимларида фаолият юритаётган пайтда ҳам бу каби моддаларни қабул қилишни давом эттирган ёки эттирмаганини аниқлаш қийин бўлганлигини ҳам алоҳида таъкидлаган. Масалан, унинг бошқарувидаги SpaceX компанияси давлат билан катта ҳажмдаги шартномалар имзолаган ва шунинг учун ходимлар орасида гиёҳванд моддалар бўйича мажбурий тестлар ўтказилиши шарт қилинган. Аммо айрим манбаларнинг таъкидлашича, Маскга ушбу тестларни ўтказиш ҳақида олдиндан маълумот берилган бўлиши мумкин.
Журналистлар томонидан кўтарилган мазкур масала 30 май куни Оқ уйда бўлиб ўтган матбуот анжуманида ҳам муҳокама қилинди. Унда Маскнинг ўзи ҳам иштирок этди ва журналистларнинг бу мавзудаги саволларига кескин жавоб қайтариб, The New York Times газетасини «сохта маълумотлар тарқатиш»да айблади. У бу мавзу бўйича изоҳ беришни рад этиб, журналистларга «йўлларида давом этиш»ни маслаҳат берди.
2024 йилнинг март ойида CNN телеканалида эфирга узатилган суҳбатда тадбиркор кетаминдан тиббий мақсадларда фойдаланишини тасдиқлаган эди. Унинг таъкидлашича, вақт-вақти билан депрессияга ўхшаш салбий ҳолатлар унинг ҳаётига таъсир қилади ва ана шундай пайтларда кетамин унга бу ҳолатдан чиқишга ёрдам беради. Маск, шу билан бирга, кетаминни ҳаддан ташқари кўп истеъмол қилмаганини, акс ҳолда бундай кучли таъсирга эга моддани ҳаддан ошиқ истеъмол қилиш унинг профессионал фаолиятига жиддий таъсир кўрсатишини таъкидлаганди.
Бу маълумотлар нафақат Маскнинг шахсий ҳаёти, балки унинг юқори давлат лавозимини эгаллаган шахс сифатидаги обрўсига ҳам жиддий таъсир кўрсатади. Шунингдек, бу можаро АҚШ жамоатчилигида янги баҳс-мунозараларни келтириб чиқарди. Ҳозирда ижтимоий тармоқларда мазкур мавзуда кенг муҳокамалар бошланиб кетган ва бу борадаги янги тафсилотларнинг пайдо бўлиши эҳтимоли юқори бўлиб қолмоқда.