Francë: Dy të vdekur, mbi 500 të arrestuar gjatë festimeve pasi PSG fiton Ligën e Kampionëve

Dy persona kanë vdekur, qindra janë arrestuar dhe janë djegur vetura në Francë gjatë natës, teksa tifozët e futbollit kanë festuar fitoren e Ligës së Kampionëve nga Paris Saint-Germain.

Epiqendra e euforisë ishte në Paris, ku tifozët parakaluan me makina, kënduan nëpër rrugë dhe hodhën fishekzjarrë, pas fitores 5:0 të PSG-së ndaj Inter Milanit në Munih.

Ministria e Brendshme e Francës tha se 491 persona u arrestuan në Paris, pas përleshjeve mes tifozëve dhe policëve.

Në mbarë Francën, përfshirë edhe Parisin, në total janë arrestuar 599, tha Ministria.

Gjatë festimeve vdiqën dy persona.

Një burrë që po ngiste në skuter në Paris vdiq pasi u godit nga një veturë. Në qytetin Dax, një djalë 17-vjeçar u ther për vdekje teksa një turmë ishte mbledhur për të festuar për fitoren e PSG-së, thanë prokurorët.

Ai vdiq “gjatë festimeve”, tha zyra e prokurorit, por nuk tregoi nëse vdekja e tij ishte e lidhur drejtpërdrejt me finalen e Ligës së Kampionëve. Në njoftim u tha se personi i dyshuar “është në arrati”.

Ministria e Brendshme tha se 18 policë janë lënduar në Paris, dhe tre të tjerë në pjesë të tjera të Francës, teksa tifozët kishin dalë në rrugë për të festuar. Edhe shtatë zjarrfikës po ashtu janë lënduar.

Autoritetet raportuan se gjatë natës janë raportuar 692 zjarre janë raportuar gjatë natës, përfshirë 264 vetura që u dogjën.

Ekipi i PSG-së do të parakalojë nëpër Paris të dielën, ku dhjetëra mijëra mbështetës të ekipit futbollist pritet të mblidhen për të festuar fitoren e Ligës së Kampionëve.