Жанубий Корея Тошкент–Андижон пуллик йўл қурилишида иштирок этади
2025 йил 6 июнда Ўзбекистон транспорт вазирининг ўринбосари Илҳомжон Абдуғафуров Жанубий Кореянинг Ер ресурслари, инфратузилма ва транспорт вазири Пак Сан У ҳамда Korea Expressway Corporation раҳбари Хам Чин Гю билан учрашув ўтказди. Томонлар транспорт соҳасида ҳамкорлик ва йўл инфратузилмасини ривожлантириш масалаларини муҳокама қилди.
Корея томони Ўзбекистонда автомагистраллар бошқаруви, интеллектуал светофорлар, ҳаракатни назорат қилувчи сунъий интеллект тизимлари каби технологияларни жорий этишни таклиф этди. Шунингдек, мутахассислар тайёрлаш ва техник ёрдам кўрсатишга тайёрлигини билдирди.
Жанубий Корея долзарб лойиҳа — Тошкент–Андижон тўловли йўлида давлат-хусусий шериклик асосида иштирок этишга қизиқиш билдирди. Korea Expressway Corporation сенсорли тўлов тизимлари, трафик мониторинг ускуналари ва бошқа рақамли ечимларни таклиф этди.
Трассанинг умумий узунлиги 314 км бўлиб, у саёҳат вақтини 5 соатдан 3 соатгача қисқартириши кутилмоқда. Эҳтимолий натижаларга кўра, лойиҳа Ўзбекистон ЯИМини 2,6% га оширади, йўл-транспорт ҳодисаларини эса 40% га камайтиради.
Лойиҳа Жаҳон банки кўмагида ишлаб чиқилган ва январь 2025 да халқаро тендер эълон қилинган. 30 дан ортиқ компания қизиқиш билдирган ва 21 июнгача аризалар қабул қилинади.
Ҳар томонлама ривожланишни таъминлаш учун йўлда ақлли светофорлар, реал вақтда йўл ҳолатини назорат қилувчи тизимлар ҳам жорий этилади. Бундан ташқари, Жанубий Корея махаллий мутахассислар учун ўқув дастурларини ҳам таклиф қилди.
Жанубий Кореяда тўлов тизими шундай йўлга қўйилганки, автомобиллар тўхтамасдан сенсор ва камералар орқали тўловни амалга оширади, бу эса тирбандликни камайтиради ва вақт тежайди.