Гасперини “Рома”да янги ҳаёт бошламоқда: Голли услуб қайтмоқда
“Мендаги илк таассуротлар жуда ижобий. Бу клуб мен учун янги саҳифа ва катта синов, айни пайтда эса унутилмас имконият. Мен айнан шундай чақирувларни орзу қилганман. Римга катта ҳаяжон ва янги мақсадлар билан келдим. Бу мен излаган адреналин, мен кутган муҳит,” — дея таъкидлади Гасперини.
Мураббийнинг фикрича, “Рома” жамоасида ўз услубини татбиқ этиш орқали мухлислар муҳаббатини қозониш энг устувор вазифалардан бири ҳисобланади. У ўзининг фалсафасини аниқ ифода этди:
“Мен бошқарган барча жамоалар шиддатли ва юқори темпда ҳаракат қилган. Улар кўп гол уриб, рақибга имконият қолдирмасликка интилишган. Мен бу услубни “Рома”да ҳам давом эттирмоқчиман. Муҳими, мухлисларга кўзга яқин ва ҳужумкор футбол тақдим этиш.”
Гасперини сўнгги 9 йилни “Аталанта”да ўтказиб, жамоани Европа грандлари қаторига чиқарганди. Унинг раҳбарлигида бергамоликлар 2024 йилда Европа Лигасини ютиб, тарихий ютуққа эришган. Энди эса у Римда янги мақсадлар сари йўл олмоқда.
Таъкидлаш жоизки, “Рома” жамоаси сўнгги мавсумда Клаудио Раньери қўл остида Европа Лигаси йўлланмасига эришганди. Раньери муваффақиятли фаолиятини якунлар экан, эстафетани Гасперинига топширди.
Энди эса клуб олдида янги мақсадлар — кучли учлик, кубоклар ва энг муҳими, мухлислар қалбини янадан қозониш бор. Жан Пьеро Гасперини эса бунга тайёр эканини очиқ айтди.
Zamin.uz таҳририяти мураббийнинг режалари қандай амалга ошишини кузатишда давом этади. Римда шиддатли ва голларга бой мавсум бошланиши эҳтимоли катта.