Тошкентдан Фарғонага гашиш олиб кетаётган наркокурерлар йўлда қўлга тушди
Ички ишлар органлари томонидан олдиндан режалаштирилган тезкор тадбир давомида Тошкент шаҳрида истиқомат қилувчи, 1998 йилда туғилган шахс назоратга олинди. У қўшни давлатдан контрабанда йўли билан олиб кирилган гашиш моддасини махсус яширин жой — “закладка” кўринишида Бекобод шаҳридаги масканда сақлаётгани аниқланди.
Тезкор ҳаракатлар натижасида у ҳамроҳи билан Қўқон шаҳридаги харидорга наркотик моддани етказиб бериш пайтида йўлда тўхтатилди. Қочишга уринишга қарамай, ҳар икки шахс муваффақиятли қўлга олинди.
Қонунчиликка кўра, мазкур хатти-ҳаракатлар Ўзбекистон Республикаси Жиноят кодексининг 273-моддаси 5-қисми — гиёҳвандлик воситаларини кўп миқдорда ноқонуний муомала қилиш — бўйича баҳоланмоқда. Жиноят иши қўзғатилиб, тергов ҳаракатлари бошланган.
Ҳуқуқни муҳофаза қилувчи органлар ушбу жиноятда бошқа шахсларнинг ҳам алоқадорлигини аниқлаш бўйича ишларни олиб бормоқда. Таъкидлаш лозимки, бу каби хатти-ҳаракатлар нафақат қонун олдида жиддий жавобгарликни талаб қилади, балки жамият хавфсизлигига ҳам катта таҳдид солади.