Маркум Айзиректи айыптаган дагы бир блогер кармалды

Май айынын аягында күйөөсүнүн колунан каза болгон Айзирек Эралиеванын аброюна шек келтирген деген жүйө менен дагы бир блогер Бауржан Абдумаликов (Кадырбеков) кармалды. Ал 26-май күнү Инстаграмдагы баракчасында маркум келиндин дарегине жазган сөздөрү коомчулуктун нааразылыгын жараткан.

Бул факт боюнча Бишкек шаардык ички иштер башкармалыгы Кылмыш-жаза кодексинин 330-беренеси ("Расалык, этностук, улуттук, диний же региондор аралык кастыкты (араздашууну) козутуу") менен кылмыш ишин козгоду.

ШИИБдин басма сөз кызматы кабарлагандай, блогер 13-июнь күнү Кыргызстан менен Казакстандын чек арасынан өтүүгө аракет кылган учурда "Ак-Жол" чек ара бекетинен кармалган. Ал Бишкек милициясына жеткирилип, убактылуу кармоочу жайына киргизилди.

Кармалган жарандын жакындары бул туурасында жана жалпы эле окуя боюнча комментарий бере элек.

Буга чейин ушундай эле негиз менен дагы бир блогер Айбек Уланов кармалып, камакка алынган. Алгач Бишкек шаардык милициясы 31 жаштагы Айбек Улановду 30-майда кармап, кое берген, ал ката кетиргенин мойнуна алып, маркумдун жакындарынан, коомчулуктан кечирим сураган. Бирок андан кийин деле түз эфирге чыгып, элдин нааразылыгын жараткан сөзүн уланткандан кийин 5-июнда кайра кармалып, бир айга камакка алынган.

Кылмыш-жаза кодексинин 330-беренеси боюнча айыптуу деп табылган жаран беш жылдан жети жылга чейинки мөөнөткө эркиндигинен ажыратылат.

26-майда Ош облусунун Кара-Кулжа районунун тургуну, 38 жаштагы Айзирек Эралиева Өзгөн районунун Алга айылына бүтүрүүчүлөрдүн 20 жылдык кечесине барып келгенден кийин беш баланын энеси өз үйүндө өлтүрүлгөн. Кылмышка шектелип 40 жаштагы күйөөсү кармалган. Ички иштер министрлиги ал аялын аңчылык курал менен атканын билдирген. Маркум келиндин жакындары Айзирек күйөөсүнүн кызганычынын курмандыгы болуп калганын айтышкан.(ZKo)