Ламин Ямал ёзни кумири Неймар билан Бразилияда ўтказмоқда

Каталониянинг "Барселона" жамоасида ва Испания терма жамоасида порлаб чиқaётган ёш юлдуз Ламин Ямал таътилни ноодатий тарзда ўтказишга қарор қилди. У ёзги дам олишнинг бир қисмини Бразилияда ўтказиш мақсадида Жанубий Америкага йўл олди. Бу ҳақда Ge.globo нашри хабар тарқатди.

17 ёшли ҳужумкор футболчининг асосий мақсади — болаликдан кумири ҳисобланган Неймар билан шахсан учрашиш. Маълумки, Ламин Ямал "Барселона" сафида ўйнашни бошлаган илк кунлариданоқ Неймарни ўзининг идеали, футболдаги илҳом манбаси сифатида кўрсатиб келади. Шу боис, унинг Бразилияга ташрифи нафақат дам олиш, балки болалик орзусини рўёбга чиқариш учун ҳам муҳим воқеа ҳисобланади.

Ламин Ямал якунланган мавсумда “Барса” сафида жуда самарали ўйин намойиш этди: у барча турнирларда жами 55 учрашувда иштирок этиб, 18 та гол уришга ва 25 та голли узатма амалга оширишга муваффақ бўлди. Бундай кўрсаткич футболда эндигина порлаётган ёш юлдуз учун улкан ютуқ саналади.

Неймар эса ҳозирда ўзининг ватан клуби “Сантос”да фаолият юритмоқда. Январь ойидан бери у жамоа сафида 14 марта майдонга тушди ва 3 та гол ҳамда 3 та ассистга муаллифлик қилди. Гарчи у энди 100 фоиз формага қайтмаган бўлса-да, Неймар ўз маҳорати ва таъсирчан ўйини билан бразилиялик мухлисларни қувонтиришда давом этмоқда.

Мухлислар эса энди Ламин Ямал ва Неймарнинг учрашувидан ҳайратли фотосуратлар ва эҳтимолий ҳамкорликлар кутишмоқда. Балки бу учрашув ёш талант учун янада янги чўққиларни забт этишга илҳом манбаи бўлиши ҳам мумкин.