Автомобиль калитида телефонга қараганда тўрт баробар кўп бактерия!

Ҳар куни ёнимизда юрадиган оддий автомобиль калити шунчаки темир парча эмас — у соғлиғимиз учун жиддий хавф манбаи бўлиши мумкин. Британиялик мутахассислар томонидан ўтказилган сўнгги тадқиқотга кўра, ушбу аксессуар мобил телефон ёки ҳатто клавиатурадан кўра анча ифлос экан.

МонейСуперМаркет таҳлилчилари 2000 нафар ҳайдовчининг калитларини микробиологик жиҳатдан ўрганиб чиқди ва ҳайратланарли хулосага келди: ҳар учинчи инсон калитини ҳеч қачон тозаламаган. Таъкидланишича, айримлар калитдан беш йиллаб фойдаланган бўлса-да, унга зарурий гигиена бермаётган экан.

Қизиғи шундаки, ўрганишлар калитларда ўртача 241 та бактерия мавжудлигини кўрсатди. Солиштириш учун, смартфонлар 66 та, клавиатуралар эса 68 та микроорганизмга эга экан. Бу эса автомобиль калитини бактерия тўпланиши бўйича анча юқори ўринга қўяди.

Янада ачинарлиси — ушбу бактериялар орасида Staphylococcus epidermidis каби инсон учун хавфли бўлиши мумкин бўлган турлар ҳам бор. У терида табиий равишда яшайди, аммо иммунитет пасайган ёки жарроҳлик операциясидан чиққан беморларда оғир асоратлар келтириб чиқариши мумкин. Ҳатто баъзи ҳолатларда ичак таёқчаси ҳам топилган.

Тозаликка эътибор бериш мақсадида мутахассислар мунтазам равишда автомобиль калитларини совунли эритма ва юмшоқ мато билан артиб туришни тавсия қилишмоқда. Оқартирувчи моддалар ёки сувга ботириш тавсия этилмайди, чунки улар калитнинг металл қисми ва ичидаги электрон тузилмага зиён етказиши мумкин.

Қўлимизда ҳар куни айланиб юрган нарсалар соғлиғимизга хавф туғдирмаслиги учун, уларни ҳам тозалик билан асрашимиз керак. Эътиборсизлик оқибатида касалликларга сабаб бўлиши мумкин бўлган бундай майда деталларга эътибор бериш — ўзимиз ва яқинларимизни муҳофаза қилишнинг энг оддий усулидир.