Нови ракетни напади меѓу Иран и Израел: Техеран нема да преговара додека Тел Авив напаѓа

Иран и Израел продолжија со меѓусебни напади рано на 21 јуни, активирајќи сирени за воздушни напади низ делови од централен Израел, вклучително и Тел Авив, откако Техеран рече дека нема да преговара за својата нуклеарна програма додека Израел не престане да напаѓа.

Околу 2.30 часот Иран активираше ракетен бараж кон Израел, покренувајќи ги израелските системи за воздушна одбрана кои пресретнаа проектили на небото над Тел Авив. Службата за итни случаи објави слики на кои се гледа пожар на покривот на повеќекатната станбена зграда во централен Израел. Локалните медиуми јавија дека пожарот бил предизвикан од остатоци од пресретнат проектил.

Набргу потоа, израелската војска соопшти дека нејзините сили започнале нов бран напади врз складишта за ракети и лансирање инфраструктурни локации во Иран.

Израел соопшти дека погодил десетици воени цели, вклучително и локации за производство на ракети, истражувачко тело за кое рече дека е вклучено во развојот на нуклеарно оружје во Техеран и воени објекти во западен и централен Иран.

Од разговорите во Женева само изјава за „голема загриженост“

Нападите се случија откако иранскиот министер за надворешни работи, Абас Аракчи, учествуваше во неколкучасовните разговори со европските министри за надворешни работи во Женева, на кои беше дадена само изјава во која се изразува „голема загриженост“ за ескалацијата на тензиите и подготвеност за повторно средба.

Министрите, исто така, ја повторија својата долгогодишна загриженост за проширувањето на иранската нуклеарна програма, за која рекоа дека „нема веродостојна цивилна цел“. Иран инсистира на тоа дека неговата нуклеарна програма е исклучиво за мирољубиви цели.

Израел почна да го напаѓа Иран на 13 јуни, велејќи дека „Техеран е на работ да развие нуклеарно оружје“. Израел проценува дека неговите напади оттогаш го одложиле потенцијалот на Техеран да развие нуклеарно оружје за „најмалку две или три години“, рече израелскиот министер за надворешни работи во интервју објавено на 21 јуни.

Над 600 жртви на обете страни

Офанзивата на Израел даде „многу значајни“ резултати, изјави министерот за надворешни работи Гидеон Сар за германскиот весник „Билд“. „Веќе ја одложивме за најмалку две или три години можноста тие да имаат нуклеарна бомба.

Но, имаше и човечки жртви. Во неговите воздушни напади загинаа 639 луѓе во Иран, според новинската агенција Активисти за човекови права со седиште во САД. Меѓу загинатите има и врвни воени офицери и нуклеарни научници.

Во Израел, според властите, 24 цивили се убиени во одмазднички ирански ракетни и беспилотни напади.

„Израел нема да ги прекине на напаѓа додека не се разбие иранската нуклеарна закана“

Американскиот претседател Доналд Трамп на 20 јуни повтори дека ќе му требаат две недели за да одлучи дали САД треба да влезат во конфликтот на страната на Израел, доволно време за, како што рече, „да се види дали луѓето ќе се вразумат или не“.

Во Њујорк, израелскиот амбасадор во Обединетите нации, Дени Данон, му рече на Советот за безбедност на 20 јуни дека неговата земја нема да ги прекине своите напади „додека не се разбие иранската нуклеарна закана“.

Иранскиот амбасадор во ОН, Амир Саид Иравани повика на акција на Советот за безбедност и рече дека Техеран е вознемирен од извештаите дека САД би можеле да се приклучат на војната.

Висок ирански функционер изјави за Ројтерс дека Иран е подготвен да разговара за ограничувањата за збогатување ураниум, но дека ќе го отфрли секој предлог што му забранува целосно збогатување ураниум, „особено сега под ударите на Израел“.

Извештај според објавите на Ројтерс и АП.