Илкай Гюндоган “Галатасарой”га ўтишга яқин – сўнгги тўсиқ нима?
34 ёшли хавбек ўзининг футбол фаолиятидаги янги босқични айнан Истамбулда давом эттиришга тайёрлигини билдирган. Туркиялик машҳур инсайдерлар хабарига кўра, футболчи ва “Галатасарой” клуби ўртасида шартнома борасида умумий келишувга эришилган. Ҳужжатлар ва шахсий шартлар борасида ҳеч қандай тўсиқ йўқ. Бироқ трансфер тўлиқ амалга ошиши учун яна бир муҳим босқич қолган – Илкай “Галатасарой” бош мураббийи Окан Бурук билан шахсий музокара ўтказиши керак.
Бу суҳбатда футболчининг тактик ролини, ўйин вақтига бўлган кафолатларини, жамоадаги ўрнини аниқлаш керак бўлади. Агар томонлар ушбу масалаларда ҳам тил топишса, трансфер расман эълон қилиниши кутилмоқда.
Гюндоган ҳозирда “Манчестер Сити” жамоаси сафида клублар ўртасидаги Жаҳон чемпионатида иштирок этмоқда ва айнан шу сабабли Туркияга учишни маълум муддатга кечиктирмоқда.
Эслатиб ўтамиз, Илкай Гюндоган “Сити” жамоаси билан кўплаб муваффақиятларга эришган, жумладан, Англия Премьер-Лигаси, Кубок ва Чемпионлар лигаси каби йирик мусобақаларда ғолиб чиққан. Унинг шартномаси тугашига фақат бир йил қолган ва инглиз клуби футболчини эркин агент сифатида кетишига қарши эмас.
Гюндоганнинг турк клубига келиши нафақат “Галатасарой” учун, балки Туркия футболи учун ҳам катта воқеа бўлади. Унинг бой тажрибаси ва етакчилик хусусиятлари жамоанинг халқаро мусобақалардаги амбицияларини амалга оширишда қўл келиши мумкин.
Шу билан бирга, Илкай Гюндоганнинг Туркияга ўтиши унинг илдизларига қайтаётганини англатади. У Германияда туғилган бўлса-да, турк оиласи фарзанди сифатида ўсган ва энди ўз юрти жамоасида сўнги йилларини ўтказиш ниятида бўлиши мумкин.
Zamin.uz мухлислар учун трансфер жараёнидаги барча янгиликларни кузатиб боради. Илк суратлар, имзоланган шартнома ва расмий тақдимот кутилаётган жараён — тез орада футбол оламидаги муҳим хабарлардан бирига айланиши мумкин.