"Барселона" ва "Реал" трансферларидаги фарқ: Деку очиқча изоҳ берди
Аввало, Деку "Реал Мадрид" ёзда амалга оширган трансферларни эътироф этди. Хусусан, ҳимоячи Дин Хюйсен ва дунё футболида ўз ўрнини топган Трент Александер-Арнольднинг жамоага қўшилиши, шунингдек, ёш ва иқтидорли Франко Мастантуоно билан шартнома имзолангани мадридликларнинг ёшариш ва сифатли таркиб шакллантириш борасида жиддий қадам ташлаётганидан дарак беради.
"Марказий ҳимоячи Хёйсен жуда яхши футболчи. Александер-Арнольд ҳам ўз позициясида энг кучлилардан бири. Улар мадридликлар сафида катта кучга айланади", – дейди Деку.
Мухбирлар "Барселона" Мастантуонога ҳам қизиқиш билдирганми, деган саволга қуйидагича жавоб олдилар: "Бизнинг вазиятимиз "Реал"никидан анча фарқ қилади. Масалан, биз Витор Рокени харид қилганимизда, Левандовски 34 ёшда эди. Келажакни ўйлаб, янги тўпурарни таркибга қўшдик. Аммо баъзида нотўғри танланган вақт ва шароитлар режаларни ўзгартиради".
Шу орқали, Деку "Барселона" ва "Реал" трансфер сиёсатлари ўртасидаги асосий фарқларга урғу берди. "Барса" кўпроқ ёшлар ва узоқ муддатли стратегияга эътибор қаратаётган бўлса, "Реал" тажрибали ва иқтидорли ёш футболчиларни бир вақтнинг ўзида жамоага қўшиб, чемпионлик сари жиддий интилаётганини кўриш мумкин.
Ҳозирда иккала клуб ҳам ўз олдига юқори мақсадларни қўйган ва янги мавсумда Ла Лигада рақобат кучайишига ҳеч қандай шубҳа йўқ. Мухлислар эса трансферлар атрофидаги жараёнларни қизиқиш билан кузатиб боришда давом этади.