Трент Александр-Арнольд кетди, “Ливерпуль” раҳбари оғир дўстлик хақида гапирди
Бу ўтиш ҳақида илк расмий фикрлардан бири клуб раҳбари Том Вернер томонидан билдирилди. Унинг сўзларига кўра, клуб футболчининг қарорини оғирлик билан қабул қилган, аммо унга нисбатан ҳурмат ва самимий эҳтиромини йўқотмаган.
“Мен учун асосий мақсад – Трентга шахсан ўз миннатдорлигимизни етказиш эди. У клуб учун кўп нарса қилди. Шу сабабдан у билан алоҳида учрашиб, у биз учун қандай қадрли эканини айтишни лозим топдим”, – дейди Вернер.
Вернернинг таъкидлашича, футболчи билан мулоқот пайтида Трент ўзига 7 ёш бўлганида академияда тушган суратни ҳам кўрсатган. Бу лаҳза клуб раҳбарияти учун ҳам, мухлислар учун ҳам жуда таъсирли бўлган.
“Бу суратни кўриб, кўз олдимиздан қанча йиллар ўтганини англадик. У болалигидан бу жамоанинг бир қисми бўлган, энди эса катта футболчи сифатида ўзининг янги саҳифасини бошламоқда. Албатта, бу жуда аламли. Мухлисларимиз ҳам бу янгиликни оғир қабул қилди, лекин Трентнинг номига боғлиқ хотиралар биз учун абадий қадрли бўлиб қолади”, – деб қўшимча қилди “Ливерпуль” раҳбарларидан бири.
Маълумот учун, Трент Александр-Арнольд “Ливерпуль”нинг ўз тарбияланувчиси бўлиб, клуб академиясидаги илк қадамларини 7 ёшида ташлаган. Унинг маҳоратли ўйинлари ва голли узатмалари жамоанинг сўнгги йиллардаги ютуқларида муҳим ўрин тутади.
Унинг кетиши нафақат бир позициядаги бўшлиқ, балки мухлислар учун қалбдаги бир ҳиссий йўқотиш сифатида қабул қилинмоқда. Аммо шу билан бирга, кўпчилик у “Реал Мадрид”да ҳам ўзини кўрсата олади, деган ишончда.
Айни пайтда, Испаниянинг машҳур клуби “Реал Мадрид” бош мураббийи Хаби Алонсо қўл остида Александр-Арнольд янги имкониятларга эга бўлади. Бу ўтиш унинг карьерасидаги янги босқич, лекин “Ливерпуль”да қолган из ва хотиралар уни унуттирмайди.
Футболда ҳар кетиш – янгича имкониятлар эшиги. Лекин айрим ўйинчилар кетса ҳам, уларнинг исми ва изи жамоанинг тарихида абадий сақланиб қолади. Трент Александр-Арнольд айнан шундай номлардан бири бўлиб қолиши аниқ.