Apple катта ўзгаришларга тайёр: iPhone 17 дисплейи янгиланиб, янги рекорд ўрнатади!
Инсайдерлик маълумотлари билан машҳур бўлган Digital Chat Station интернет фойдаланувчиси ўз саҳифасида Apple'нинг янги смартфони дисплейи 6,1 дюймдан 6,3 дюймгача оширилишини хабар қилди. Эътиборлиси, бу манба аввалги башоратларида ҳам камдан-кам хатога йўл қўяди. Шу сабабли ушбу маълумотларнинг ишончлилиги юқори баҳоланмоқда.
Эслатиб ўтамиз, Apple охирги марта iPhone асосий моделидаги экран диагоналини 2019 йилда ўзгартирган эди. Ўшанда iPhone 11 дисплейи 5,8 дюймдан 6,1 дюймгача кенгайтирилганди. Бу ўзгаришдан кейин смартфонларнинг ўлчами шу пайтгача ўзгармасдан келмоқда эди.
Қайд этилишича, 2024 йилда тақдим этилган iPhone 16 Pro ҳам шунга ўхшаш янгиланишни қабул қилган. Унинг дисплейи ҳам асосан рамкаларни ингичкалаштириш орқали катталаштирилган. Бундан келиб чиқиб, янги стандарт iPhone моделида ҳам экран атрофидаги рамкалар ингичка бўлиши эҳтимоли юқори.
Янги iPhone 17 сериясининг кутилган моделлари эса қуйидаги ўлчамларда чиқиши мумкин:
- Асосий iPhone 17 – 6,3 дюйм;
- iPhone 17 Air (ёки Slim модели) – 6,6 дюйм;
- iPhone 17 Pro – 6,3 дюйм;
- iPhone 17 Pro Max – 6,9 дюйм.
Apple бу ўзгаришларни амалга ошириш орқали смартфонларнинг фойдаланиш қулайлигини ошириш ва контент истеъмолида янада яхшироқ тажриба тақдим этишга интилаётган кўринади.
Асосий iPhone моделида кутилаётган яна бир муҳим янгилик экран янгиланиш частотаси билан боғлиқ. Агар аввалги моделларда дисплей частотаси 60 Гц бўлган бўлса, янги iPhone 17 моделида бу кўрсаткич 120 Гц га оширилиши мумкин. Лекин бу ProMotion технологияси билан бирга эмас, балки стандарт ҳолатда ишлаши айтилмоқда. Яъни Always-On-Display ёки динамик частота мослашиши мавжуд бўлмайди.
Шунингдек, 2025 йил сентябрь ойида бўлиб ўтадиган iPhone 17 тақдимотида янги операцион тизим – iOS 26 ҳам намойиш этилади. Apple бу тизимни сўнгги 11 йилдаги энг катта янгиланиш сифатида эълон қилган. Унинг янги шаффоф дизайни фойдаланувчиларга мутлақо янгича ҳис-туйғулар бағишлаши мумкин.
Компания 2025 йилдан бошлаб ҳар йили смартфонлар дизайнини ўзгартиришни мақсад қилган. Бу йил, яъни 2025 йилда асосий янгиланиш смартфонларнинг орқа камера модули билан боғлиқ бўлади. 2026 йилда эса Apple олд панелни янгилашни режалаштирмоқда. Лекин энг йирик ва эътиборга лойиқ ўзгаришлар айнан 2027 йилда чиқадиган iPhone моделларида бўлиши тахмин қилинмоқда.
Apple мухлислари ва технология ишқибозлари учун олдиндаги йиллар янада қизиқарли ва интригаларга бой бўлади. Янги iPhone моделлари эса ўзгаришлар билан бозордаги рақобатни янада қизитишини кутиш мумкин.