Нақд пулга уй олиш тақиқланиши мумкин

Ўзбекистонда нақд пулда йирик харидлар қилиш чекланиши мумкин, деб Uz24.uz хабар берди. Бу ҳақда Солиқ қўмитаси раисининг биринчи ўринбосари Мубин Мирзаев маълум қилди. Унинг сўзларига кўра, яширин иқтисодиётга қарши курашиш мақсадида президент қарори лойиҳаси ишлаб чиқилган бўлиб, унда нақдсиз ҳисоб-китобларни рағбатлантириш кўзда тутилган.

Ушбу тизим босқичма-босқич жорий этилади:

. Катта суммадаги харидлар — жумладан, уй-жой ва автомобил савдолари — босқичма-босқич фақат нақдсиз шаклда амалга оширилиши режалаштирилмоқда.

. Биринчи навбатда кўчмас мулк савдоларини нақд пулсиз шаклга ўтказиш кўзда тутилган.

Мубин Мирзаевнинг таъкидлашича, ҳозирда уй сотиш ва сотиб олиш жараёнлари асосан нақд пул ёки тўлов хизматлари орқали амалга оширилмоқда. Янги лойиҳа эса бу жараённи қонуний тарзда, банк айланмаси орқали амалга ошириш ва тегишли рағбатлантириш механизмларини жорий этишни назарда тутади.

Аслида, бу борадаги режалар ўтган йилнинг баҳоридаёқ маълум қилинган эди — яъни уй-жой, кўчмас мулк ва автомобил битимларини фақат банк орқали амалга ошириш таклиф этилган.