Умар Мармуш: Жамоа руҳи ва оила муҳити “Манчестер Сити”ни муваффақиятга етакламоқда

“Манчестер Сити”нинг мисрлик ҳужумчиси Умар Мармуш жамоадаги ўзига хос муҳит, ўйинчилар ўртасидаги дўстона муносабат ва бирдамлик ҳақида тўхталиб ўтди. Яқинда “City Xtra” нашрига берган интервьюсида у жамоанинг ҳар бир аъзоси учун умумий мақсад ва катта оила муҳити қандай муҳим эканини таъкидлади.

Мармушнинг айтишича, “Сити” сафида ўйинчилар нафақат майдонда, балки унинг ташқарисида ҳам доимо бирга бўлишади. “Биз кун давомида барча овқатланишларни, ҳатто бўш вақтни ҳам бирга ўтказамиз. Бу эса нафақат ўзаро муносабатларни, балки жамоавий химияни ҳам мустаҳкамлайди. Ҳар биримиз ўзимизни катта оиланинг ажралмас қисми деб ҳис қиламиз”, — дейди 26 ёшли футболчи.

Жамоавий муҳит ва самимийлик катта ғалабалар пойдевори

Умар Мармуш жамоадаги бирдамлик ва бир-бирини қўллаб-қувватлаш руҳи натижасида ҳар бир ўйинчи ўзини ишончли ва руҳлантирилгандек ҳис қилишини таъкидлади. “Сити” сафидаги ҳар бир ўйинчи ўз ўрни ва масъулиятини ҳис қилади, бу эса майдондаги натижаларда ҳам ўз ифодасини топади.

Эслатиб ўтамиз, жорий йилнинг январ ойида клуб сафига қўшилган Мармуш бу қисқа вақт ичида 24 учрашувда майдонга тушиб, 8 та гол ва 3 та ассист қайд этди. Мураббийлар ва жамоадошлари унинг ўйинини ва жамоага мослашувини юқори баҳолашмоқда.

Мухлислар интиқлик билан кутмоқда

1 июль куни “Манчестер Сити” ўз тарихидаги яна бир муҳим беллашувда — Клублар ўртасидаги Жаҳон чемпионати 1/8 финалида Саудия Арабистонининг “Ал-Ҳилол” жамоасига қарши баҳс олиб боради. Ушбу беллашув Тошкент вақти билан эрталаб соат 06:00 да старт олади. Мухлислар “шаҳарликлар”дан ғалаба ва ярим финал йўлланмасини кутиб туришибди.

Бу тарихий ўйин олдидан Мармушнинг жамоа ичидаги бирдамлик ва руҳий муҳит ҳақидаги фикрлари “Сити”нинг янада кучли ва бирлашган жамоа сифатида ҳаракат қилаётганини тасдиқлайди. Ҳар бир футболчи учун катта оила муҳити энг асосий мотивация манбаи эканлиги яна бир бор намоён бўлмоқда.