ԱԱԾ-ից մարդու ինտիմ կյանքի վերաբերյալ տեղեկությունները Փաշինյանի ձեռքին շանտաժի գործիք են ընդամենը. Նինա Կարապետյանց
«Մեդիալաբի» հարցերին պատասխանում է Հելսինկյան ասոցիացիայի նախագահ, իրավապաշտպան Նինա Կարապետյանցը
– Տիկի՛ն Կարապետյանց, Նիկոլ Փաշինյանը «Կրթվելը նորաձև է» շարժման հերթական հանդիպման ժամանակ պատասխանելով հարցին, թե որտեղից է ինքը ստանում հոգևորականների անձնական կյանքի վերաբերյալ տվյալներ ու դրանց մասին հրապարակումներ անում, պատասխանել է. «Եկեղեցականներն իրենց գործողություններով հայտնվել են օպերատիվ ուշադրության կենտրոնում։ ԱԱԾ-ն վարչապետին ենթակա մարմին է և ԱԱԾ-ն ինձ ամեն օր զեկուցում է Հանրապետությունում օպերատիվ վիճակի մասին»: Նորմա՞լ երևույթ է սա, թե՞ այնուամենայնիվ կան մարդու իրավունքների խախտումներ:
– Վարչապետի գնահատմամբ՝ ամեն ինչ նորմալ է, նա համարում է, որ երկրի օպերատիվ վիճակի մասին տեղեկությունները վերաբերում են հոգևորականների ինտիմ բնույթի ենթադրյալ հարաբերություններին, այսինքն՝ վարչապետի համար դա ամենակարևորն է, ենթադրում եմ, եթե նման տեղեկություններ են բերում նրան:
Անշուշտ դա մեծ խախտում է, որովհետև մարդու անձնական կյանքը, եթե դա որևէ կերպ, որևէ գործով չի կարող հետաքրքրություն առաջացնել, վարչապետին զեկուցելու հարց չէ, անգամ որևէ գործի պարագայում, դարձյալ վարչապետին զեկուցելու հարց չէ, որովհետև դա վարույթն իրականացնող մարմինը պետք է անի, գաղտնիության գրիֆ ունի, դա չի կարելի հրապարակել ցանկացած երրորդ անձի:
Ակնհայտ է, որ Նիկոլ Փաշինյանը հստակ հրահանգ է տվել, որ բոլոր տեսակի խոցելի հարցերի վերաբերյալ իրեն անմիջապես զեկուցեն, ու ինքը դա օգտագործում է՝ չարաշահելով, շահարկելով իր զբաղեցրած պաշտոնը, որովհետև մի դեպքում ինքը հարցեր է բարձրացնում՝ իբրև Հայ Առաքելական Եկեղեցու հետևորդ, ունի իհարկե դրա իրավունքը, մյուս կողմից՝ ապօրինի օգտագործում է իր ձեռքի տակ եղած լծակները՝ մարդկանց ինտիմ հարաբերությունների մասին տեղեկություններ հավաքելու համար: Սա հետագայում պետք է գնահատականի արժանանա, երբ ինքն այլևս վարչապետ չլինի:
Անձնական բնույթի տվյալների տարածման հետ կապված կան սահմանափակումներ, բայց քանի որ ոչ մի բան չի փոխվել այս երկրում, ու երբ իրենց ձեռնտու է՝ իրենք օգտվում են նախկիններից մնացած «բարիքներից», դրա համար էլ ոչ մի բարեփոխում չէին անում, ինչի մասին ես ժամանակին ասել եմ:
Մենք չունենք որևէ կառույց, որն ադեկվատ կգտնվի ու այս ամենին կարձագանքի, փոխարենը լուռ հետևում են այս ամենին ու որոշ դեպքերում արդարացնում են՝ գլխավոր դատախազը, արդարադատության նախարարը, մնացած բոլորը, որոնք լիազորություններ ունեն կանգնեցնելու այս խայտառակ գործընթացը:
– Այստեղ նաև խախտվում է Եկեղեցի-պետություն՝ միմյանց գործերին չմիջամտելու սկզբո՞ւնքը:
– Այդ սկզբունքը խախտվել է շատ վաղուց, մենք դրա մասին արդեն մոռացել ենք, դա հակասահմանադրական գործողություն է, մենք հասել ենք նրան, որ մարդկանց ինտիմ կյանքի վերաբերյալ տեղեկություններն են մեծ թափով տարածվում, թեպետ սա էլ շատ սպասելի էր, որովհետև նույն Նիկոլ Փաշինյանն էր իր նախկին կուսակից Հովիկ Աղազարյանի անձնական չատը քննարկել թիմակիցների հետ: Երբ այս խայտառակությունը տարածվեց, այն չդատապարտվեց, խնդիր չառաջացրեց՝ այդ թվում քաղհասարակության ներսում, դա պետք է ստանար իհարկե իր հաջորդ դրսևորումը, ու հիմա հաջորդ արարն է:
Սա չի կանգնելու այնքան ժամանակ, քանի դեռ Նիկոլ Փաշինյանը շարունակում է պաշտոնավարել: Բոլորը, ովքեր կհայտնեն իրենց անհամաձայնությունը այս իշխանությանը, Նիկոլ Փաշինյանը կամ կհայտարարի, որ այդ մարդիկ ահաբեկչություն են նախապատրաստում, կամ էլ նրանց անձնական բնույթի տվյալներն է հրապարակելու, Դոգի դերն է կատարելու մի խոսքով:
– Տիկի՛ն Կարապետյանց, այսինքն՝ հիմնավորումը, որ ԱԱԾ-ն վարչապետին ենթակա մարմին է, ու սա նորմալ է, չկա օրենքի խախտում, այդքա՞ն էլ հիմնավոր չէ:
– Հաստատ դա հիմնավորում չէ, որովհետև վարչապետին օպերատիվ տեղեկություն են հայտնում երկրի ներսում ու դրսում պետության համար հնարավոր սպառնալիքների հետ կապված, այլ ոչ թե՝ սրա-նրա ինտիմ կյանքի: Ինչ ազդեցություն կարող է ունենալ այս կամ այն մարդու ինտիմ կյանքը երկրի աշխարհաքաղաքական, անվտանգային կամ այլ հարցերում, դա ընդամենը Նիկոլ Փաշինյանի ձեռքին շանտաժի գործիք է:
– Թեև դուք խնդիրներ ու խախտումներ եք տեսնում այս ամենում, իշխանության ներկայացուցիչները շարունակում են պնդել, թե դատաիրավական համակարգն անկախ է, թե Փաշինյանը ցուցում չի տալիս որևէ դատավորի:
– Նորմալ է, հո չէին ասի, որ յոթ տարում ամեն բան քանդուքարափ են արել: Ես կսպասեմ նրան, որ իրենք այլևս իշխանության չեն լինելու, ու իրենց վերաբերյալ անպայման քրեական պատասխանատվության հարց կլինի, ու իրենք այս նույն դատարանների հետ կբախվեն ու կդժգոհեն, ինչպես այսօր անում են բոլոր նրանք, ովքեր նախկինում կապ ունեին դատաիրավական համակարգի հետ, որոնք ժամանակին հաշտ էին այս համակարգի հետ: Այդ ժամանակ էլ իրենց կասեմ, որ սա ձեր փոփոխած համակարգն է, բարով վայելեք:
Քրիստինե Աղաբեկյան
MediaLab.am
The post ԱԱԾ-ից մարդու ինտիմ կյանքի վերաբերյալ տեղեկությունները Փաշինյանի ձեռքին շանտաժի գործիք են ընդամենը. Նինա Կարապետյանց first appeared on MediaLab Newsroom-Laboratory.