Польшадан рекорд сармоя: снаряд ишлаб чиқариш беш баравар оширилади

Европанинг шарқида геосиёсий хавфсизлик ва мудофаа масалалари тобора долзарб аҳамият касб этмоқда, деб ёзади defence24.pl. Польша ҳукумати бугун мамлакат мудофаа салоҳиятини мустаҳкамлаш ва ташқи таҳдидларга қарши мустақилликни таъминлаш мақсадида навбатдаги тарихий қадамни қўймоқда.

Яқин кунларда Польша давлат мудофаа концерни PGZ (Polska Grupa Zbrojeniowa) артиллерия снарядларини ишлаб чиқариш бўйича улкан инвестицияга эга бўлади. Давлат активлари вазири Якуб Яворовскийнинг таъкидлашича, бу йўналишда 663 миллион доллар миқдоридаги қўшимча сармоя тўғридан-тўғри маҳаллий ишлаб чиқариш қувватларини кенгайтиришга сарфланади. Бунинг натижасида 155 ва 120 миллиметрли артиллерия снарядлари ишлаб чиқариш беш бараварга оширилади ва йиллик ҳажм 180 минг донани ташкил этади.

Яворовскийнинг сўзларига кўра, Полша импорт қуролларга бўлган қарамликдан воз кечиш ва ҳарбий жиҳатдан тўлиқ автономияга эришишни мақсад қилган. Бу орқали мамлакат нафақат ташқи таҳдидлардан, хусусан, Россия омилларидан ҳимояни кучайтиришга, балки НАТО доирасидаги етакчилик позициясини мустаҳкамлашга интилаяпти.

Бугунги кунда PGZ йилига 30 мингта йирик калибрли снаряд ишлаб чиқарса, яқин уч йилда бу кўрсаткични 150–180 мингга етказиш режалаштирилмоқда. Яъни, Польшадаги ишлаб чиқариш заводлари технологик жиҳатдан тўлиқ модернизация қилинади ва янги иш ўринлари яратилади.

Financial Times маълумотига кўра, Польша НАТО давлатлари ичида мудофаа харажатлари бўйича энг катта улушга эга мамлакатлардан бири: 2025 йилда мамлакат ЯИМнинг 4,7 фоизини айнан ушбу соҳада сарфлайди. Аммо айни пайтгача маблағларнинг асосий қисми АҚШ ва Жанубий Кореяга чиқиб кетган бўлса, энди эса ҳукумат ички салоҳиятни қўллаб-қувватлаш ва миллий индустрияни рағбатлантиришга қарор қилди.

Таҳлилчилар фикрича, бу саъй-ҳаракатлар Польшага стратегик хавфсизликдаги реал мустақиллик, янги технологиялар ва иқтисодий барқарорлик олиб келиши мумкин. Янги сармоя оқими орқали мамлакат мудофаа соҳасида Европадаги етакчилар қаторига кириш имконига эга бўлади.

Польшадаги мазкур янгиланишлар нафақат ҳарбий, балки ижтимоий ва иқтисодий ривожланишда ҳам катта тўлқин уйғотмоқда. Жаҳон сиёсий саҳнасида янги реалликлар пайдо бўлаётган бир пайтда, ушбу ислоҳотлар Польша учун келажакда стратегик устунликка айланиши мумкин.