Орангутанга сигарет узатган россиялик спортчи кескин танқидга учради

Россиялик ёш боксчи Анастасия Лучкинанинг қилмиши нафақат жамоатчилик, балки экологик тузилмалар томонидан ҳам қаттиқ танқидга учрамоқда. Унинг "Тайган" ҳайвонот боғида электрон сигарет чекиб тургани ва уни ҳатто орангутанга ҳам узатгани акс этган видео ижтимоий тармоқларда кенг тарқалди, деб хабар берди shot телеграм канали.

Кадрларда у бир неча марта бу хатарли ҳаракатни такрорлаётгани кўринган. Шу кунларда эса, айнан ўша маймун — "Дана" лақабли ягона Қрим орангутани — ўзини бутунлай нотинч тутаётгани маълум бўлди.

Мутахассисларнинг маълум қилишича, маймуннинг иштаҳаси йўқолган, у одамлар билан мулоқот қилишни хоҳламай қолган ва бутун кун давомида ҳаракатсиз ҳолда ётиб олмоқда. Бу ҳолат унинг саломатлиги жиддий равишда хавф остида эканидан далолат беради.

Айни пайтда асосий гумон — орангутан электрон сигарет картриджини ютиб юборган бўлиши мумкин. Унда тахминан 2,5–3 миллилитр никотинли суюқлик бўлган, бу эса ҳайвоннинг ошқозонига тушса, оғир заҳарланишга сабаб бўлиши аниқ. Ветеринарлар текширувларни давом эттирмоқда, натижалар эса яқин кунларда эълон қилинади.

Анастасия Лучкинанинг мураббийи Владимир Акатов журналистлар саволларига қисқа жавоб берди:
— Анастасиянинг сигарет чекишини билмас эдим. У ҳозир таътилда. Қайтгач, бу масалани албатта муҳокама қиламиз, – деди у.

Эслатиб ўтамиз, "Дана" 2018 йилдан буён Қримдаги мазкур боғда яшайди ва "Қизил китоб"га киритилган орангутан турининг жониворидир. У бутун Қримда бундай турдаги ягона маймун ҳисобланади.

Кўпчилик фойдаланувчилар ва экологлар мазкур ҳолат бўйича расмий чоралар кўрилиши, боксчига нисбатан жавобгарлик белгиланиши кераклигини таъкидламоқда. Чунки инсон хато қилса, уни кечирса бўлади, аммо бу ҳолатда ҳайвон азоб чекмоқда — бу эса кечириб бўлмас хатодир.