დანიაში დააკავეს გერმანიაში ირანის სასარგებლოდ ჯაშუშობაში ეჭვმიტანილი პირი
გერმანიის პროკურატურის განცხადებით, დანიაში დააკავეს მამაკაცი, რომელიც ეჭვმიტანილია ბერლინში ირანული დაზვერვისთვის ებრაული ადგილებისა და პირების შესახებ ინფორმაციის შეგროვებაში, შესაძლოა თავდასხმების განხორციელების მიზნით.
დანიის მოქალაქე, რომელიც გერმანიის კონფიდენციალურობის წესების შესაბამისად მხოლოდ ალი ს.-ს სახელით არის ცნობილი, დანიის ქალაქ ორჰუსში დააკავეს.
პროკურატურის მტკიცებით, მამაკაცს წლის დასაწყისში ირანის დაზვერვის სამსახურმა ბერლინში „ებრაული ადგილებისა და კონკრეტული ებრაელი პირების“ შესახებ ინფორმაციის შეგროვება დაავალა. მათ დეტალები არ დაუკონკრეტებიათ.
პროკურატურა აცხადებს, რომ მან ივნისში სამ ობიექტს უთვალთვალა, „სავარაუდოდ, გერმანიაში შემდგომი სადაზვერვო საქმიანობისთვის მომზადების მიზნით, შესაძლოა, მათ შორის ებრაულ სამიზნეებზე ტერორისტული თავდასხმებისთვის“.
გერმანიის იუსტიციის მინისტრმა სტეფანი ჰუბიგმა განაცხადა, რომ „თუ ეს ეჭვი დადასტურდება, საქმე გვაქვს აღმაშფოთებელ ოპერაციასთან“ და დასძინა, რომ „ებრაელთა სიცოცხლის დაცვა გერმანიის მთავრობისთვის უმთავრესი პრიორიტეტია“.