Microsoft’нинг янги AI тизими шифокорлардан 4 баробар аниқ натижа кўрсатди

Microsoft'нинг илмий жамоаси сўнгги тадқиқот натижаларини эълон қилди, деб Rozetked хабар берди. Янги ишлаб чиқилган MAI Diagnostic Orchestrator (MAI-DxO) тизими сунъий интеллектга асосланган бўлиб, ChatGPT, Gemini, Claude ва Grok каби бир неча моделларни бирлаштиради. Бу тизим гўё бир нечта мутахассис шифокорлар биргаликда ишлаётгандек сценарийни симуляция қилади.

Натижаларга кўра, MAI-DxO тизими шифокорлардан тўрт баробар аниқроқ ташхис қўйишга эришди — ҳар 5 ҳолатдан 4 тасида тўғри ташхис қўйган, шифокорлар эса фақат биттасини. Шунингдек, иқтисодий жиҳатдан ҳам самарали бўлиб, текширувлар ва таҳлилларни тўғри танлаш орқали хизмат харажатини 20% га камайтирди.

Microsoft'нинг AI бўйича бош директори Мустафа Сулеймон бу технологияни «тиббиётдаги суперинтеллект сари йўл» деб атади. Маълумотларга кўра, компания ушбу воситани Bing'га интеграция қилишни режалаштирмоқда.

MIT университети олимларидан Дэвид Зонтаг бу тизимни қизиқарли деб баҳолади, аммо натижаларга эҳтиёткорлик билан ёндашишни тавсия қилди. Унинг айтишича, тадқиқотда иштирок этган шифокорларга қўшимча воситалардан фойдаланмаслик тавсия этилган, шунинг учун AI билан тенг шароитда эмасдилар. Шу билан бирга, нейрон тармоқнинг ташхислари ҳаётий тажрибага эмас, моделлаштиришга асосланган.