Қазақстанның қай өңірлерінде орман өрті қаупі жоғары?
Қазақстанның қай өңірлерінде өрт қаупі жоғары? Бұл сұраққа Экология министрлігінің Орман шаруашылығы және жануарлар дүниесі комитеті төрағасының орынбасары Мақсат Елемесов жауап берді, - деп хабарлайды Tengrinews.kz тілшісі.
Комитет басшысының орынбасарының айтуынша, бүгінде Қазақстанда өрт қаупінің жоғары, бесінші класы орнаған. Ауа температурасы 35 градустан жоғары, жауын-шашын жоқ, сол себепті Мақсат Елемесовтің айтуынша, "орман қорының бүкіл аумағы қауіп аймағында".
"Ең үлкен қауіп – қылқан жапырақты ормандарда. Қарағайлы ормандарда ең алдымен орманның үстіңгі бөлігіне өрт таралу қаупі жоғары. Солтүстік Қазақстан облысындағы жапырақты ормандарда қайың ағаштарының арасында да өрт басталып жатыр, бірақ ол жерде жоғары өрт болмайды, төменгі өрт аса үлкен қауіп тудырмайды", – деп түсіндірді комитет төрағасының орынбасары ОКҚ брифингінде.
Қарағайлы, қылқан жапырақты ормандарда өрт шыққан жағдайда, жоғарыға таралу қаупі бар, бұл ормандардың жойылуына әкелуі мүмкін.
"Қауіп аймағында шамамен жеті облыс бар: Шығыс Қазақстан, Абай облысы, Павлодар, Қостанай, Ақмола, Алматы және Қарағанды облыстары. Бұл – қарағайлы ормандар мен орман алқаптары бар өңірлер", – деп қосты Елемесов.
Жоғарғы орман өрті – бұл орманның үстіне (ағаштардың ұшар басына) таралатын орман өрті, ол әсіресе қылқан жапырақты ағаштар үшін өте қауіпті.
Төменгі орман өрті – орманның төменгі бөлігінде, орман төсемінде, жапырақ пен қылқан жапырақты жабында таралатын өрт.
Сілтемесіз жаңалық оқисыз ба? Онда Telegram желісінде парақшамызға тіркеліңіз!