აშშ-ის სახელმწიფო დეპარტამენტი: აშშ უკრაინისთვის იარაღის მიწოდებას გააგრძელებს
აშშ-ს უკრაინისთვის სამხედრო დახმარება არ შეუჩერებია, შეზღუდვები შეეხო რაკეტების ზოგიერთ ტიპს, - თქვა ვაშინგტონში გამართულ ბრიფინგზე სახელმწიფო დეპარტამენტის პრესსპიკერმა ტემი ბრიუსმა.
„ჩვენ არ შეგვიწყვეტია უკრაინაში იარაღის გაგზავნა“, - განაცხადა ბრიუსმა. მან დააზუსტა, რომ აშშ-ის თავდაცვის დეპარტამენტს უკრაინის დასახმარებლად მრავალი „სანდო ვარიანტი“ აქვს.
ამის ფონზე უკრაინის ოფიციალურმა პირებმა The Economist-ს განუცხადეს, რომ აშშ-მ შეაჩერა ყველანაირი დახმარება, მათ შორის ჭურვებითა და სათადარიგო ნაწილებით.
1 ივლისს CBS-ისა და NBC News-ის წყაროებმა თქვეს, რომ პენტაგონის ხელმძღვანელმა პიტ ჰეგსეტმა ბრძანა უკრაინისთვის გარკვეული საბრძოლო მასალის მიწოდების შეჩერება, მათ შორის - Patriot-ის საჰაერო თავდაცვის სისტემის ათობით რაკეტის. შეჩერების მიზეზი აშშ-ის სამხედრო არსენალების ამოწურვა იყო. Bloomberg-ის წყაროების ცნობით, ევროპელი ოფიციალური პირები გაოგნებული იყვნენ აშშ-ის გადაწყვეტილებით.
CBS-ის წყაროები თეთრი სახლიდან იტყობინებიან, რომ იარაღის მიწოდების შეჩერებამ გავლენა მოახდინა არა მხოლოდ უკრაინაზე, არამედ სხვა ქვეყნებზეც. ისინი აცხადებენ, რომ პენტაგონი განიხილავს ყველა იმ ქვეყნის ვითარებას, რომლებიც აშშ-ისგან იღებენ იარაღს. აშშ-ის ახლანდელ მთავრობას სურს გაარკვიოს, რომ წინა ადმინისტრაციის დროს პრიორიტეტები „ამერიკის ინტერესების შესაბამისად“ იყო განსაზღვრული. Politico ექვს წყაროზე დაყრდნობით წერს, რომ კიევი აპირებს ვაშინგტონს სთხოვოს, ევროპას უკრაინის შეიარაღებული ძალებისთვის ამერიკული იარაღის შეძენის ნებართვა მისცეს.
გამოცემის თანამოსაუბრეებმა აღნიშნეს, რომ რამდენიმე ევროპული ქვეყანა უკვე ამუშავებს აშშ-სგან უკრაინისთვის იარაღის შეძენის გეგმებს. გამოცემა აღნიშნავს, რომ ეს თანხა ჩაითვლება ალიანსის ქვეყნების მიერ ნატოს სამიტზე ცოტა ხნის წინ დამტკიცებულ თავდაცვის ხარჯებში. საბოლოო გადაწყვეტილებები ჯერ არ არის მიღებული.
NBC News-ის ცნობით, აშშ-მა გადადო Patriot-ის ტიპის ათობით საზენიტო რაკეტის, ათასობით 155-მილიმეტრიანი საარტილერიო ჭურვის, 100-ზე მეტი Hellfire-ის ტიპის რაკეტის და სხვა იარაღის მიწოდება. ტელეარხის წყაროებმა აღნიშნეს, რომ პენტაგონის ხელმძღვანელმა შესაბამისი ბრძანება მაშინ გასცა, როდესაც იარაღის ნაწილი უკვე ევროპაში იყო და მზად იყო გადასაცემად.