ЎзПФЛ делегацияси АҚШда MLS тажрибасини ўрганмоқда
Сир эмаски, ҳар икки ташкилот мутахассислари ҳар йили Жаҳон лигалари ассоциациясининг йиллик конгрессида биргаликда иштирок этади.
1996 йилда ташкил топган MLS ўзининг 30 йиллик тарихида катта йўлни босиб ўтишга эришди. Бугунга келиб MLS телетрансляция ҳуқуқлари, маркетинг, футболчилар билан шартномавий муносабатлар каби масалаларда улкан муваффақиятларга эришиб келмоқда. Мазкур жараёнлар ва бу йўлда босиб ўтилган қадамлар ЎзПФЛ учун катта мактаб вазифасини ўтай олади. Шундай экан, MLS билан ўзаро тажриба алмашиш ЎзПФЛ учун муҳим аҳамият касб этади.
АҚШ сафарига Лига раҳбари Диёр Имомхўжаев бошчилигида Мусобақаларни ўтказиш, Маркетинг, Халқаро алоқалар ҳамда Медиа бўлими бошлиқлари, шунингдек, Ўзбекистон футболчилар уюшмаси раиси ҳамда бир вақтнинг ўзида Лига Ижроия қўмитаси аъзоси ҳисобланган Камолиддин Мурзоев йўл олди. Ишчи гуруҳ аъзоларини MLS'нинг мусобақалар масалалари бўйича ижрочи вице-президенти Нельсон Родригес кутиб олди ва у ташкилот мутахассислари билан ўтказилган барча учрашувларда бевосита иштирок этди.
Лига таклифидан келиб чиққан ҳолда, MLS қуйидаги мавзуларнинг ҳар бири бўйича алоҳида тақдимотлар тайёрлаган бўлиб, улар шу йўналишлар учун жавобгар бўлган асосий координаторлар томонидан маъруза қилинди:
- Интеллектуал мулк ва тижорий ҳуқуқлар — Шиненн Физерстон (Бизнес масалалари консули), Жордан Франклин (Ёрдамчи консул);
- Мусобақалар ўтказиш масалалари — Пол Грейфер (Мусобақалар ўтказиш бўлими бош мутахассиси);
- MLS Next ва MLS Next Pro дастурлари — Гордон Бенгстон (MLS Next дастури координатори);
- Футболчилар шартномаларини бошқариш — Кристина ЛаБри (Шартномалар бўлими офицери);
- Трансляциялар ва медиа — Ёҳанна Рохас (Трансляция масалалари координатори).
Манба: pfl.uz