Модрич: "Президент йиғлади, мен ҳеч қачон йиғлаганини кўрмаганман"

Лука Модрич футболдаги буюк сафарини якунлар экан, "Реал Мадрид" билан хайрлашув онларида кўзи ёшга тўлди. Унинг сўзларига кўра, клуб президенти Флорентино Перес уни кузатар экан йиғлаб юборган. Бу воқеа фақат спорт эмас, инсонлар ўртасидаги самимий алоқалар ҳам қанчалик қимматли эканини яққол намоён қилди.

“Президент мен учун оддий раҳбар эмасди. У менга биринчи кунданоқ ишонч билдирди, муҳаббат кўрсатди. Буни бутун фаолиятим давомида ҳис қилиб келдим. У менга ҳамиша бошқалардан фарқли муносабатда бўлди. Шунинг учун кетиш арафасида уни йиғлаётганини кўриш мен учун қаттиқ таъсирли бўлди. Мен президентни ҳеч қачон бундай ҳолатда кўрмаганман”, – дея хотиралари билан ўртоқлашди 39 ёшли маэстро.

Флорентино Перес ва Лука Модрич ўртасидаги муносабатлар йиллар давомида самимият ва ўзаро ҳурмат асосида қурилган эди. Модричнинг “Реал”даги йўли — бу шон-шараф, истеъдод ва садоқат тарихидир. У клуб сафида бир неча бор Европа чемпиони бўлиб, дунё футболида ўчмас из қолдирди.

Айни пайтда, ишончли манбаларга кўра, хорватиялик футболчи эркин агент сифатида “Реал Мадрид”ни тарк этиб, Италиянинг “Милан” клуби билан бир йиллик шартнома имзолаган. Бу қарор билан у Европанинг бошқа бир гранд жамоасида фаолиятини давом эттирмоқчи.

Модричнинг кетиши нафақат “Реал”нинг, балки бутун футбол оламининг бир даврини якунламоқда. Мухлислар унинг ақлли ўйинларини, аниқ узатмалари ва мушоҳадага асосланган ҳаракатларини ҳали кўп йиллар тилак билан эслашади.

У кетмоқда, лекин қолдирган излари "Реал Мадрид" клуби тарихида доим ёдда қолади.