ღაზის ჯანდაცვის უწყება: ომის 21 თვის მანძილზე დაღუპულ პალესტინელთა რიცხვმა 58 ათასს გადააჭარბა
ღაზაში 21-თვიანი ომის დროს დაღუპული პალესტინელების რიცხვმა 58 000-ს გადააჭარბა, განაცხადა ტერიტორიის ჯანდაცვის სამინისტრომ 13 ივლისს.
სამინისტრო არ განასხვავებს მშვიდობიან მოსახლეობასა და მებრძოლებს შორის, თუმცა აცხადებს, რომ დაღუპულთა ნახევარზე მეტი ქალები და ბავშვები არიან.
დაღუპულთა რიცხვის ზრდა იმ დროს ხდება, როდესაც ისრაელი და ჰამასი (აშშ-ში და ევროკავშირში ტერორისტული ორგანიზაცია) აშშ-ს ცეცხლის შეწყვეტის პირობებს განიხილავენ, რომლის ფონზე ისრაელის მიერ ღაზაში განხორციელებული თავდასხმების შედეგად, სულ მცირე, 19 ადამიანი დაიღუპა, იუწყებიან საავადმყოფოები, რომელთა თანახმად, მათ შორის ექვსი ბავშვია.
სააგენტოების ცნობით, რომელიც ჯანდაცვის ადგილობრივი მუშაკებს ეყრდნობა, ისინი წყლის შესაგროვებლად იდგნენ.
ისრაელმა და ჰამასმა 21-თვიანი ომის შეჩერებისა და რამდენიმე ისრაელელი მძევლის გათავისუფლების მიზნით გამართულ მოლაპარაკებებში გარღვევას ვერ მიაღწიეს. ისრაელის პრემიერ-მინისტრი ბენიამინ ნეთანიაჰუ გასულ კვირას ვაშინგტონში იმყოფებოდა, რათა ტრამპის ადმინისტრაციასთან შეთანხმება განეხილა.
ისრაელს სურს, რომ ძალები შეინარჩუნოს სამხრეთ ღაზის სექტორში, მისი თქმით, მნიშვნელოვან სახმელეთო დერეფანში. ჰამასი მიწის ამ ზოლში ჯარების განთავსების დაჟინებულ მოთხოვნას იმის ნიშნად მიიჩნევს, რომ ისრაელი დროებითი ცეცხლის შეწყვეტის ვადის ამოწურვის შემდეგ ომის გაგრძელებას აპირებს.
ისრაელი აცხადებს, რომ ომს მხოლოდ მას შემდეგ დაასრულებს, რაც ჰამასი დანებდება, განიარაღდება და გაძევებული იქნება, რაზეც ის უარს ამბობს. ჰამასი აცხადებს, რომ მზადაა გაათავისუფლოს დარჩენილი 50 მძევალი - რომელთა ნახევარზე ნაკლებია ცოცხალი, როგორც ამბობენ - ომის დასრულებისა და ისრაელის ძალების სრული გასვლის სანაცვლოდ.
ღაზაში ომის განმავლობაში, ძალადობამ იმატა ისრაელის მიერ ოკუპირებულ პალესტინელთა ტერიტორიაზე, იორდანეს დასავლეთ სანაპიროზეც, სადაც კვირას ორი პალესტინელი დაასაფლავეს. მათ შორის იყო 20 წლის პალესტინელი-ამერიკელი საიფოლა მუსალეტი, რომელიც ებრაელი ახალმოსახლეების თავდასხმის შედეგად დაიღუპა, იტყობინება პალესტინის ჯანდაცვის სამინისტრო.
ცენტრალურ ქალაქ ზავაიდაში, ისრაელის მიერ სახლზე განხორციელებული დარტყმის შედეგად, ცხრა ადამიანი დაიღუპა, მათ შორის ორი ქალი და სამი ბავშვი, განაცხადეს ალ-აქსას მოწამეთა საავადმყოფოს ოფიციალურმა წარმომადგენლებმა.
ისრაელელმა სამხედროებმა განაცხადეს, რომ ბოლო დღის განმავლობაში 150-ზე მეტ სამიზნეს დაარტყეს, თუმცა უშუალოდ კონკრეტული დარტყმების შესახებ კომენტარი არ გაუკეთებიათ. ისრაელი მშვიდობიან მოსახლეობას შორის მსხვერპლში ჰამასს ადანაშაულებს, რადგან დაჯგუფება დასახლებულ რაიონებში მოქმედებს.
2023 წლის 7 ოქტომბერს ჰამასის მეთაურობით განხორციელებული თავდასხმის დროს, რომელსაც ომი მოჰყვა, დაახლოებით 1200 ადამიანი მოკლეს და 251 გაიტაცეს.
ღაზის სექტორის ჯანდაცვის სამინისტროს მონაცემებით, ისრაელის შემდგომი თავდასხმების შედეგად დაღუპულთა რიცხვმა 58 ათასს გადააჭარბა, ხოლო მათი ნახევარზე მეტი ქალი და ბავშვი იყო.
გაერო და სხვა საერთაშორისო ორგანიზაციები მის მონაცემებს ომის დროს მსხვერპლის შესახებ ყველაზე სანდო სტატისტიკად მიიჩნევენ.