უკრაინაში მსხვერპლი მოჰყვა რუსეთის ჯარების მორიგ შეტევას
მსხვერპლი და ხანძრები მოჰყვა უკრაინაზე რუსეთის ჯარების მორიგ შეტევას, რომელიც 14 ივლისის დილამდე გაგრძელდა.
სუმის საოლქო-სამხედრო ადმინისტრაციის ცნობით, დრონებით და მართვადი ავიაბომბებით შეტევის შედეგად შოსტკის რაიონში ორი ადამიანი დაიღუპა და ოთხი დაიჭრა. დაშავებულებს შორის ერთი ბავშვია. დაზიანებულია 30-მდე მრავალსართულიანი და კერძო სახლი და არასაცხოვრებელი შენობები.
უკრაინის საგანგებო სიტუაციების სამსახურის ინფორმაციით, ქალაქ სუმიში რუსული დრონით დარტყმა იყო სამოქალაქო ინფრასტრუქტურის ობიექტზე, რომელიც მასშტაბურმა ხანძარმა მოიცვა. სამსახური კონკრეტულ ობიექტს არ ასახელებს.
უპილოტო საფრენი აპარატებით შეტევის შედეგად სამი ადამიანი, მათ შორის ორი ბავშვი დაიჭრა დნეპროპეტროვსკის ოლქში. ხანძარი გაჩნდა რამდენიმე სახლში.
უკრაინის საჰაერო ძალების სარდლობის მიერ დილით გამოქვეყნებული მონაცემებით, გასული ღამის განმავლობაში მოწინააღმდეგემ გამოიყენა 4 საზენიტო მართვადი რაკეტა და 136 დამრტყმელი დრონი, რომელთაგან 61 ჩამოაგდეს, 47 კი რადიოელექტრონული ბრძოლის საშუალებებით გააუვნებლეს.
სარდლობა ადასტურებს რუსული დრონებით უშუალო დარტყმას 28 ადგილზე და ნამსხვრევების ჩამოცვენას 4-ზე.
განახლება: ადგილობრივი დროით დილის 11 საათისთვის რუსეთის ჯარებმა დრონებით ისევ შეუტიეს უკრაინის ქალაქ სუმის. საოლქო პროკურატურის ცნობით, ერთ-ერთ სასწავლო დაწესებულებაზე დარტყმის შედეგად 6 ადამიანი დაიჭრა.