Құқық қорғау органдарында бұрын лауазымды қызмет атқарған Олеся Кексель азаптау ісі бойынша күдіктіге айналды
Бұрын Сыбайлас жемқорлыққа қарсы іс-қимыл агенттігі тергеу департаменті басшысының орынбасары, Бас прокуратураның арнайы прокурорлар қызметінің жетекшісі сияқты жоғары лауазымдар атқарған Олеся Кексель азаптау дерегі бойынша қозғалған қылмыстық іс аясында күдікті деп танылды. Мұндай ақпаратты Бас прокуратураның хабарына сүйеніп, Tengrinews.kz сайты хабарлады.
"2025 жылғы 4 шілдеде Бас прокуратура Қылмыстық кодекстің 146-бабының 2-бөлігінің 1-ші және 2-тармақтарына сәйкес ("Азаптау") көзделген қылмысты жасады деген күдікпен Сыбайлас жемқорлыққа қарсы іс-қимыл ұлттық бюросының Тергеу департаменті басшысының бұрынғы орынбасары Кексель О.И.-ні күдікті деп таныды", – деген Бас прокуратураның жазғанын келтірген басылым.
Прокуратура қазір сотқа дейінгі тергеу жалғасып, қосымша дәлелдер жинақталып жатқанын, тергеу мүддесіне байланысты өзге мәліметтер жария етілмейтінін жазған. Кексельден бөлек бұл істе тағы кімдер күдікті ретінде тартылғаны, кім жәбірленуші деп танылғаны және басқа да жайттар әзірге белгісіз, ресми органдар оның егжей-тегжейін айтқан жоқ.
Олеся Кексель биыл 3 шілде күні ұсталған Сыбайлас жемқорлыққа қарсы іс-қимыл ұлттық бюросының бұрынғы басшысы Талғат Татубаев тәрізді азаптау бабы бойынша қозғалған істе күдікті деп танылыпты-мыс деген хабар өткен аптада әлеуметтік желіде тараған. Алайда ол кезде ресми орындардан мұны растайтын ақпарат болған жоқ.
14 шілде күні ҚазТАГ ақпарат агенттігі өз дереккөздеріне сүйеніп, Талғат Татубаев азаптау фактісі бойынша қозғалған қылмыстық іс аясында екі айға қамауға алынды, деп хабарлады.
Талғат Татубаев пен Олеся Кексель бір іске қатысты күдікті санала ма, жоқ па – әзірге белгісіз. Бірақ бұл екеуі бұрын Сыбайлас жемқорлыққа қарсы ұлттық бюрода бірге лауазымды қызмет істеген. Кексельдің өзі я заңды өкілдері бұл жайтқа қатысты әзірге ешқандай пікір білдірген жоқ.
Олеся Кексельдің есімі бұған дейін де, 2019 жылы бір шулы істе аталған. Кексель мен Бас прокуратураның тергеу тобының мүшесі Бауыржан Ғаббасовқа қатысты сотқа дейінгі тергеу ісінің қозғалуына бір кәсіпкердің арызы түрткі болған. Шағым иесі осы азаматтар тергеу кезінде заңға қайшы әдістерді қолданғанын айтқан. Бірақ әуелі Бас прокуратура, кейін сол кездегі ішкі істер министрі Ерлан Тұрғымбаев та Кексельге байланысты іс "қылмыс құрамы жоқ болғандықтан тоқтады" деп хабарлаған.
Олеся Кексель 2018-2019 жылдары Сыбайлас жемқорлыққа қарсы Ұлттық бюроның тергеу департаменті басшысының орынбасары болып қызмет атқарған. Кейін Бас прокуратураның арнайы прокурорлар қызметін басқарған.
Кексель Қазақстанның бұрынғы премьер-министрі Серік Ахметов, бұрынғы ұлттық экономика министрі Қуандық Бишімбаев, бұрынғы денсаулық сақтау министрі Жақсылық Досқалиевтің ісі сияқты Қазақстандағы ірі даулы істер бойынша тергеу тобына жетекшілік еткен.