პარლამენტთან სკამის მიტანის გამო მოსამართლემ თათია აფრიამაშვილი 4000 ლარით დააჯარიმა
თბილისის საქალაქო სასამართლოს მოსამართლე კობა ჩაგუნავამ 4000-ლარიანი ადმინისტრაციული ჯარიმის გადახდა დააკისრა აქტივისტ თათია აფრიამაშვილს.
აქტივისტის ინფორმაციით, საქმე ეხება 2025 წლის 21 მარტს რუსთაველის გამზირზე მომხდარ შემთხვევას, როდესაც სამართალდამცავებმა თათია აფრიამაშვილი და მასთან ერთად კიდევ ორი აქტივისტი პარლამენტის წინ პლასტმასის სკამების მიტანისთვის დააკავეს.
დაკავებულ გოგოებს სურდათ, რომ აქციაზე შეკრებილებისთვის, რომლებიც იქ ღამეს ათენებდნენ, პლასტმასის სკამები მიეტანათ, თუმცა პოლიციამ ამის საშუალება არ მისცა.
დაკავებულები იმავე საღამოს გაათავისუფლეს, თუმცა სამართალდამცავები მათ ედავებოდნენ ადმინისტრაციულ სამართალდარღვევას, პოლიციის კანონიერი მოთხოვნისადმი დაუმორჩილებლობას.
თათია აფრიამაშვილს თვე-ნახევრით ადრე, 30 მაისს, თბილისის საქალაქო სასამართლოს მოსამართლე მანუჩარ ცაცუამ 12-დღიანი პატიმრობა შეუფარდა - მას შსს "ქართული ოცნების" დეპუტატ მარიამ ლაშხისთვის შეურაცხყოფის მიყენებას ედავებოდა.
ლაშხმა 17 მაისს მომხდარი ინციდენტის გამო ჯამში სამ აქტივისტს უჩივლა - ამ დღეს ერთ-ერთ კაფეში, სადაც ლაშხი თანმხლებ პირებთან, მათ შორის მცირეწლოვან შვილებთან ერთად იყოფებოდა, ისინი მასთან მივიდნენ შეძახილებით: "თავისუფლება რეჟიმის ტყვეებს, არა რუსულ რეჟიმს, ძირს რუსეთის მონები, არა რუსეთის მონებს..."
შსს სამიდან ორის შემთხვევაში 45-დღიან პატიმრობას ითხოვდა, ერთ შემთხვევაში კი - ჯარიმას.
სასამართლომ თათია აფრიამაშვილის მსგავსად 12-დღიანი პატიმრობა შეუფარდა ლიკა ლორთქიფანიძესაც, მაგდა მამუკაშვილი კი 4 000 ლარით დააჯარიმეს.