Йоахим Лёвга янги чақирув: машҳур мураббий футболга қайтиш арафасида
Унга яқин кунларда турли клублар ва битта миллий ассоциациядан расмий таклифлар келиб тушгани маълум бўлди. Бу ҳақда у Германиянинг машҳур "Европа парки"да бўлиб ўтган тадбирда очиқча гапирди, деб хабар берди swr.de.
"Сўнгги бир-икки ҳафта ичида менга мурожаат қилиб, суҳбатлашишга тайёрлигимни ва қизиқишим бор-йўқлигини сўрашди", — деди тажрибали мутахассис.
Йоахим Лёв бу таклифлар юзасидан ҳозирча қарор чиқармаганини, аммо ҳар бир таклифни диққат билан ўрганаётганини билдирган. Унинг айтишича, эндиги босқичда у жамоаларнинг имкониятлари, таркиби, мақсадлари ва ёндашувларини пухта таҳлил қилади. Агар барчаси мувофиқ келса, у масъуллар билан юзма-юз учрашув ўтказишни ҳам истамоқда.
Бу, албатта, футбол жамоатчилигида қизиқиш уйғотди. Чунки Лёв номини эшитгандаёқ кўз олдингизга Жаҳон чемпионатининг олтин медалини ютадиган кучли Германия келади. 2014 йилдаги Бразилиядаги мундиалда айнан Лёв бошчилигидаги Германия тарихда илк бор Жанубий Америкадаги жаҳон чемпионатида ғолиб чиққан енгилмас Европа термаси бўлган эди.
Шундан сўнг у яна бир неча йил терма жамоага раҳбарлик қилди, аммо 2021 йилда ўз ихтиёри билан лавозимни тарк этди. Шундан буён у иш фаолиятидан танаффус олиб, футбол ҳаётидан бироз четда юрган эди.
Айни пайтда эса, унинг янги чақирувларга жиддий ёндашаётгани, яна катта футболга қайтишга тайёрланаётганидан дарак бермоқда. Мухлислар ўртасида эса унга қайси жамоа мурожаат қилгани борасида турли тахминлар янграяпти.
Қизиқ томони, аввалроқ Ўзбекистон футбол ассоциацияси ҳам немис мутахассиси билан музокара олиб бораётгани ҳақида хабарлар тарқалган эди. Агар бу хабарлар рост бўлса, Лёвни ўзбек футболида кўриш эҳтимоли ҳам мавжуд.
Унинг қайта иш бошлаши нафақат мураббийлик тажрибаси, балки замонавий футболга бўлган ёндашуви билан ҳар қандай жамоа учун катта бойлик бўлиши шубҳасиз. Шунинг учун унинг кейинги қадамлари футбол олами учун қизиқарли сценарийларга йўл очиши мумкин.