Исроил тинчлик истамайди — Туркия Ғазодаги геноцидга баёнот берди

БМТ Хавфсизлик кенгашида Ғазодаги гуманитар фожиа муҳокамасига бағишланган фавқулодда йиғилишда Туркия ташқи ишлар вазири Ҳоқон Фидан қаттиқ ва ошкора баёнот билан чиқиш қилди. У ўз нутқида Исроилнинг Фаластин халқини йўқ қилишга қаратилган ҳаракатларини тўхтовсиз геноцид деб атади ва халқаро жамоатчиликни бундан кўз юмишда айблади, деб хабар берди aa.com.tr.

Фидан нутқининг бошидаёқ Исроилни танқид остига олиб, “Исроил тинчликни истамайди. Исроил барқарорликни хоҳламайди”, деб таъкидлади. У Ғазо секторидаги фуқароларнинг қийналишлари ҳақида сўз юритар экан, 2 миллиондан зиёд аҳоли шунчалик оғир аҳволга тушиб қолганини айтдики, улар оммавий кўчиш, очлик, сувсизлик ва доимий ҳаво ҳужумлари каби қийинчиликларга дуч келмоқда.

Вазирга кўра, Исроил ҳар куни инсонпарварлик ёрдамларини атайлаб тўсиб, фақат гуманизм асосида ташкил қилинган озиқ-овқат ва сув тарқатиш нуқталарида турли йўллар билан фуқароларни йўқ қилмоқда. Унинг таъкидлашича, болалар сув олиш учун, оналар эса фарзандлари учун овқат излаётган пайтда ўлдирилмоқда.

“Очлик бугун уруш қуролига айланган. Халқаро гуманитар ҳуқуқ меъёрлари қўпол равишда бузилмоқда. Айтинг, бу қандай қилиб инсонийликка тўғри келади?”, — деди у. Фиданнинг баёнотида дунё бугун концлагерларнинг қайта пайдо бўлишига гувоҳ бўлаётгани, Фаластин эса бутунлай қирғин қурбонига айлангани қайд этилди.

У, шунингдек, “Исроилнинг уруш машинаси нафрат, жазосизлик ва муайян кучлар томонидан сўзсиз қўллаб-қувватланиши билан куч оляпти”, дея сўзларини давом эттирди.

Ҳоқон Фидан геноцид ҳақида гапиришдан чекиниш инсонликка хос эмаслигини ва Ғазодаги фожиаларни жиловлаш учун жаҳон ҳамжамияти томонидан қатъий чоралар кўрилиши зарурлигини уқтирди. “Бу фақат Ғазонинг эмас, бутун инсониятнинг имтиҳонидир”, — деди Туркиянинг ташқи ишлар вазири.

Ҳозирда эса кўзлар Хавфсизлик кенгашига қаратилган — бу баёнотлар амалда қандай натижа беради, уни вақт кўрсатади.