ვაშინგტონმა და კარაკასმა პატიმრები გაცვალეს
სალვადორის ციხეში მყოფი ვენესუელის 200-ზე მეტი მოქალაქე, რომლებიც აშშ-დან იყვნენ დეპორტირებულები ორგანიზებულ დანაშაულთან შესაძლო კავშირების გამო, სამშობლოში დაბრუნდნენ.
მათი დაბრუნება განხორციელდა ვაშინგტონსა და კარაკასს შორის პატიმართა გაცვლის პროგრამის ფარგლებში.
პარალელურად, აშშ-ში დაბრუნდა 10 ამერიკელი, რომლებიც ვენესუელის ციხეებში იმყოფებოდნენ.
როგორც სააგენტო Reuters იტყობინება, სალვადორის პრეზიდენტმა ნაიიბ ბუკელემ პლატფორმა X-ზე დაწერა, რომ გათავისუფლებული ამერიკელები ჯერ სალვადორში ჩავლენ და იქიდან გააგრძელებენ გზას სამშობლოში.
აშშ-ის სახელმწიფო მდივანმა მარკო რუბიომ დაადასტურა მათი გათავისუფლება და ბუკელეს მადლობა გადაუხადა თანამშრომლობისთვის.
ვენესუელის ხელისუფლების განცხადებით, სულ გათავისუფლდა ვენესუელის 252 მოქალაქე, რომლებიც სალვადორის მაღალი უსაფრთხოების დაწესებულებაში იხდიდნენ სასჯელს.
მათი დეპორტაცია აშშ-დან მიმდინარე წლის მარტში, მას შემდეგ მოხდა, რაც აშშ-ის პრეზიდენტმა დონალდ ტრამპმა გამოიყენა 1798 წლის "უცხოელ მტერთა შესახებ" კანონი საემიგრაციო კანონების გვერდის ავლით.
ამ გადაწყვეტილებამ უფლებადამცველების მწვავე კრიტიკა და აშშ-ში არაერთი სასამართლო დავა გამოიწვია.
ვენესუელის მთავრობა აცხადებს, რომ ყველა გათავისუფლებულს ჩაუტარდება სამედიცინო შემოწმება და ამის შემდეგ გაუშვებენ სახლში. ხელისუფლების მონაცემებით, მხოლოდ შვიდ მათგანს აქვს წარსულში სერიოზული კრიმინალური გამოცდილება.
აშშ ასევე აცხადებს, რომ გაცვლის ფარგლებში ვენესუელაში გათავისუფლდა დაახლოებით 80 პოლიტიკური პატიმარი.
თუმცა ადგილობრივი ხელისუფლება მხოლოდ „ალტერნატიული აღკვეთის ღონისძიებების“ გამოყენებაზე საუბრობს.
ვენესუელის შინაგან საქმეთა მინისტრი, დიოსდადო კაბელიო აცხადებს, რომ 18 ივლისს გათავისუფლდა ყოფილი გუბერნატორი, ოპოზიციონერი პოლიტიკოსი, უილიამს დავილა, რომელიც გასული წლის აგვისტოში დააკავეს.
ოფიციალური ვენესუელა ასევე აცხადებს, რომ აშშ-ში, მშობლებისგან განცალკევებული შვიდი ვენესუელელი ბავშვი უკვე სამშობლოშია, რომლებიც ქვეყანაში აშშ-დან ბოლოს დეპორტირებულ ჯგუფთან ერთად ჩავიდნენ.