“ҚазАзот“ зауытындағы апаттан төрт жұмысшы зардап шекті
Маңғыстау облысы әкімінің баспасөз қызметі "ҚазАзот" АҚ-ның өндірістік нысанында техникалық апат салдарынан төрт адам жарақат алғанын айтты, - деп хабарлайды Tengrinews.kz тілшісі.
Зардап шеккен жұмысшыларға термиялық күйік диагнозы қойылды: екеуі жансақтау бөліміне, ал қалған екеуі травматология бөліміне жатқызылған. Медициналық көмек көрсету үшін Қазақстанның бас реаниматологы мен күйік саласы бойынша жетекші мамандар тартылды.
Әкімдік мәліметіне сәйкес, бүгінде зардап шеккендердің жағдайы тұрақты, оларға барлық қажет медициналық көмек көрсетіліп жатыр.
"Маңғыстау облысының мемлекеттік еңбек инспекциясы департаментінің дерегінше, апат болған кезде кәсіпорында өртпен жұмыс жүргізілген, бірақ тиісті рұқсат құжаттары ресімделмеген. Қайғылы оқиға жабық кеңістікте отты жұмыстар жүргізу кезінде еңбек қауіпсіздігі ережелерінің бұзылуынан туындауы мүмкін. Бұл жағдайды анықтау үшін арнайы комиссия құрылды. Оқиғаға қатысты ҚР Қылмыстық кодексінің 156-бабы – "Еңбекті қорғау қағидаларын бұзу" бойынша қылмыстық іс қозғалды", – делінген ресми хабарламада.
Әкімдік баспасөз қызметі "ҚазАзот" компаниясы зардап шеккен жұмысшылардың отбасыларына қажетті көмек көрсететінін де атап өтті.
Анықтама үшін: "ҚазАзот" АҚ - Қазақстандағы аммиак пен аммиак селитрасын өндіретін жалғыз кәсіпорын. Компания бұл өнімдерді елдің ауыл шаруашылығы және басқа да салаларға жеткізетін ірі тасымалдаушылардыі бірі.
Айта кетейік, 2024 жылы Қазақстанда өндірістік орындарда болған жазатайым оқиғалар салдарынан шамамен 1500 адам зардап шеккен, олардың 220-сы қаза тапқан. Бұл туралы еңбек және халықты әлеуметтік қорғау министрі Светлана Жақыпова мәлімдеген болатын.
Сілтемесіз жаңалық оқисыз ба? Онда Telegram желісінде парақшамызға тіркеліңіз!