Бернарду Силва янги жамоага ўтиш арафасида турибди
Англия чемпиони ҳисобланган "Манчестер Сити" клубининг тажрибали ва маҳоратли ярим ҳимоячиси Бернарду Силва учун жавобгар қарорлар мавсуми бошланмоқда. Унинг фаолиятида навбатдаги босқичга қадам ташлаш эҳтимоли ортиб бормоқда, деб хабар берди footballinsider247.com.
Маълумотларга қараганда, португалиялик футболчи ҳозирда ўз агенти Жорже Мендеш билан биргаликда турли вариантларни кўриб чиқмоқда. Сабаби — "шаҳарликлар" томонидан Силвага ҳали ҳеч қандай янги шартнома таклиф этилмаган. Бу эса вазиятни янада ноаниқ ва хавотирли ҳолатга келтирмоқда.
Силванинг клуб билан амалдаги шартномаси 2026 йилнинг ёзигача амал қилса-да, шу пайтда у кетиши мумкин бўлган энг қизиқарли номзодлардан бири сифатида кўрилаётир. Мендеш эса янги мавсум бошланмасидан аввал Бернардуни асосий таркибда тўп сурадиган, ишонч ва ўйин амалиёти кафолатланган жамоага жойлаштиришни мақсад қилган.
Эътиборлиси шундаки, “Манчестер Сити” раҳбарияти бу ёзда 30 ёшли футболчини трансфер рўйхатига қўйиш ниятида эмас. Гвардиола ўз шогирдини жамоада сақлаб қолишни хоҳламоқда. Бироқ жамоа ичидаги катта рақобат, ёш футболчиларнинг чиқиши ва Европа грандларининг қизиқиши Силванинг қарорини тезлаштириши мумкин.
Силва 2017 йилдан буён “Сити” сафида тўп суриб келмоқда ва бу давр мобайнида жамоа билан бир неча бор Англия чемпиони, Кубок соҳибига айланган. Унинг майдондаги ақл билан ҳаракат қилиши, ўйинни ташкил этишдаги ҳиссаси ва техник маҳорати мухлислар ва мутахассислар томонидан ҳар доим эътироф этилган.
Охирги мавсумда Бернарду жамоа учун муҳим ўйинларда қатнашди: у 52 та ўйинда майдонга тушиб, 6 та гол урди ва 5 та ассист билан жамоадошларини қувонтирди. Унинг самарали ўйини “Сити”нинг юқори даражадаги натижаларини таъминлашда муҳим аҳамият касб этган.
Агар клуб келаси ҳафталарда янги шартнома бўйича ҳаракат қилмаса, Бернарду Силва янада фаол музокараларга қадам ташлаши мумкин. Мухлислар эса унинг тақдири бўйича яқин кунларда аниқ хабар бўлишини интизорлик билан кутмоқда.
Таниқли ярим ҳимоячининг кейинги манзили қаер бўлади — бу савол ҳозирча очиқ қолмоқда. Аммо бир нарса аниқ: Бернарду Силва қайси жамоага ўтмасин, ўзини майдонда эътироф эттиришни билади.