Android смартфонларининг зилзилада ҳаётни қутқарадиган яширин функцияси
Google мутахассислари тушунтиришича, тизимнинг асосида ҳар бир замонавий смартфонда мавжуд бўлган акселерометр сенсори ётади. Бу сенсор одатда қурилманинг ҳаракати, бурилиши ёки тезланишига жавоб беради. Android смартфонларида акселерометр горизонтал, вертикал ва чуқурлик ўқи бўйича ҳар қандай майда тебранишни сеза олади. Агар смартфон заминда тебранишни қайд этса, у зилзила эҳтимолини англатиши мумкин.
Тизим ишлаш тартибига кўра, акселерометр зилзила пайтида тупроқнинг ҳар қандай ноодатий тебранишини аниқлайди ва ушбу маълумотларни Google серверларига юборади. Шу жойда, фойдаланувчининг тахминий манзили ҳам серверга юборилади. Google бутун ҳудуддаги минглаб смартфонлардан жамланган маълумотларни таҳлил қилади ва зилзила ҳақидаги фактини тасдиқлайди. Агар воқеа тасдиқланса, ўша минтақага хавф ҳақида тезкор огоҳлантириш юборилади.
Сўнгги йилларда мазкур тизим 18 мингдан ортиқ зилзилани қайд этиб, 100 дан зиёд давлатдаги миллионлаб одамларга фойдали огоҳлантиришлар берган. Аҳамиятлиси, аксарият ҳолларда фойдаланувчилар зилзила бошланишидан 15 сония олдин, айримлар эса 1 дақиқа олдин огоҳлантирилган. Бу эса хавфсиз жойга чиқиб олиш, муҳим ҳужжат ва буюмларни олиш, болаларни огоҳлантириш ёки уйдан чиқишга имконият яратади.
Технологиянинг яна бир устун жиҳати – Google тизимни 2020 йилда йўлга қўйган бўлса, 2021 йилдан Ўзбекистон ҳам бу имкониятдан фойдаланишни бошлади. Маҳаллий Android фойдаланувчилари телефонларидаги созламалар орқали зилзила ҳақида огоҳлантириш функциясини фаоллаштиришлари мумкин.
Экспертлар бу тизимни табиий офатларга қарши курашда янги босқич, деб ҳисоблашмоқда. Хулоса шуки, ҳар бир замонавий смартфон эгаси ўз хавфсизлигини кучайтириш мақсадида ушбу функциядан фойдаланишни ўйлаб кўриши керак. Зеро, технология фақат қулайлик эмас, балки ҳаётни асраш учун ҳам хизмат қилиши мумкин.