უფლებადამცველების ცნობით, სამხრეთ სირიაში დაღუპულთა რიცხვმა 1000-ს გადააჭარბა
ლონდონში დაფუძნებული სირიის ადამიანის უფლებათა მონიტორინგის ცენტრის მონაცემებით, სამხრეთ სირიაში დრუზებისა და ბედუინების თემების წევრების, ასევე სამთავრობო ჯარებისა და ისრაელის არმიის მონაწილეობით შეტაკებების შედეგად დაღუპულთა რიცხვმა 1000-ს გადააჭარბა.
სირიასა და ისრაელს შორის ცეცხლის შეწყვეტის შეთანხმების შემდეგ, რეგიონში ძალადობა ბოლო დღეებში შემცირდა.
ადამიანის უფლებათა დამცველი ჯგუფების ცნობით, გასულ კვირას 600-ზე მეტი დრუზი დაიღუპა, მათ შორის დაახლოებით 300 მშვიდობიანი მოქალაქე, რომლებიც, სავარაუდოდ, ძალოვანმა უწყებებმა მოკლეს.
ასევე დაიღუპა 300-ზე მეტი ჯარისკაცი და პოლიციელი და 20-ზე მეტი ბედუინი არაბი, მათ შორის სამი მშვიდობიანი მოქალაქე, რომლებიც დრუზებმა მოკლეს. ისრაელის საჰაერო დარტყმებს თხუთმეტი ადამიანი ემსხვერპლა.
კვირას ბედუინთა ტომების წარმომადგენლებმა განაცხადეს შეიარაღებული დანაყოფების გასვლის შესახებ ქალაქ სუვაიდიდან, რომელიც გასულ კვირას შეტაკებების ეპიცენტრი გახდა. მანამდე ქვეყნის ხელისუფლებამ გამოაცხადა ჯარების სუვეიდიდან გასვლის შესახებ - მას შემდეგ, რაც ეს მოითხოვა ისრაელმა, რომელმაც დამასკი დრუზების დევნასა და იმაში დაადანაშაულა, რომ სამთავრობო ჯარები, ფაქტობრივად, ეხმარებიან მათ მოწინააღმდეგეებს, ბედუინებს.
დრუზების მნიშვნელოვანი რაოდენობა ისრაელში ცხოვრობს და ქვეყნის ხელისუფლება აცხადებს, რომ მზადაა დაიცვას ამ ეთნოკონფესიური ჯგუფის წარმომადგენლები ისრაელის გარეთ, სირიის ტერიტორიაზე.
სირიის დროებითმა პრეზიდენტმა, აჰმედ ალ-შარაამ, რომელიც სუნიტი ბედუინების მიმართ სიმპათიებს არ მალავს, შაბათს მათ მოუწოდა, შეწყვიტონ შეტაკებები დრუზებთან და გაიყვანონ შეიარაღებული ძალები სუვაიდიდან.
ამ კვირის დასაწყისში, სუვაიდაში დრუზების თემსა და ბედუინთა შეიარაღებულ ძალებს შორის ძალადობრივი შეტაკებები მოხდა. ამ მოვლენების შემდეგ, ისრაელის თავდაცვის ძალებმა სამხრეთ სირიასა და დამასკში სირიის მთავრობის პოზიციების წინააღმდეგ საჰაერო დარტყმების სერია განახორციელეს.
ისრაელმა სირიის ჯარები სირიის დრუზების მოსახლეობის წინააღმდეგ სასამართლოს გარეშე მკვლელობებსა და რეპრესიებში მონაწილეობაში დაადანაშაულა და ხაზგასმით აღნიშნა, რომ IDF-ის ქმედებები საზოგადოების დაცვას ისახავდა მიზნად.
ისრაელმა მოუწოდა საერთაშორისო საზოგადოებას, გადადგას ნაბიჯები სირიაში უმცირესობების უსაფრთხოებისა და უფლებების უზრუნველსაყოფად და სირიის ამჟამინდელი ხელმძღვანელობის საერთაშორისო აღიარების ნებისმიერი ფორმა დაუკავშიროს ამ ვალდებულებების შესრულებას.
აშშ არ უჭერს მხარს სირიაში IDF-ის დარტყმებს და მოუწოდებს ცეცხლის შეწყვეტისკენ.
სირიის საკითხებში აშშ-ის სპეციალურმა წარმომადგენელმა ტომ ბარაკმა მოუწოდა სირიაში მეომარ ყველა მხარეს, „დადონ იარაღი და იმუშაონ სხვა უმცირესობებთან ერთად, რათა შექმნან ახალი და ერთიანი სირიული იდენტობა ჩვენს მეზობლებთან მშვიდობიანად და კეთილდღეობით“.
გაეროს ადამიანის უფლებათა ოფისმა გაეროს ლტოლვილთა უმაღლეს კომისარს მოუწოდა გამოიძიოს მასობრივი ხოცვა-ჟლეტის ცნობები და უზრუნველყოს ჰუმანიტარული დახმარება სუვაიდას პროვინციაში. გაეროს ცნობით, სირიაში 120 000-ზე მეტ ადამიანს მოუწია საკუთარი სახლების დატოვება შეტაკებების გამო.
ბაშარ ალ-ასადის რეჟიმის დამხობისა და ალ-შარაას ხელმძღვანელობით ახალი ხელისუფლების ხელისუფლებაში მოსვლის შემდეგ, სირიაში პერიოდულად იფეთქებს ხოლმე ეთნიკურ და რელიგიურ ნიადაგზე ძალადობის შემთხვევები. სუნიტი არაბების გარდა, ქვეყანაში ცხოვრობენ ალავიტები, დრუზები, ქურთები და ქრისტიანი არაბები. სირიის ტერიტორიის ნაწილი კვლავ არ კონტროლდება ცენტრალური ხელისუფლების მიერ.