Ўзбекистонда 45 даражали иссиқлик кузатилади: эҳтиёт бўлинг
Мутахассисларнинг таъкидлашича, бу дамлардаги иқлим шароити қатор ҳудудларда одатдагидан ҳам иссиқроқ кечиши мумкин. Хусусан, кундузги ҳарорат кўрсаткичлари +40...+43 даража атрофида бўлиши кутилмоқда. Ўзбекистоннинг жанубий минтақаларида эса ҳаво ҳарорати +44...+45 даражагача кўтарилиши эҳтимоли бор.
Айниқса, иш ҳафтасининг иккинчи ярмидаги прогнозларга кўра, иссиқлик анча барқарор сақланиб қолиши мумкин. Кундузи ҳарорат асосан +38...+41 даража атрофида бўлиб, айрим жойларда +42...+43 даражагача етиши мумкин. Тунги пайтларда ҳам ҳаво совуши деярли кузатилмайди — +23...+28 даражада қолиши тахмин қилинмоқда.
Айнан шундай шароитларда инсон саломатлигига боғлиқ хавфлар ортиши мумкин. Жумладан, куёш уришидан тортиб, суюқлик танқислиги, қон босимининг кескин кўтарилиши ёки тушиши каби ҳолатлар эҳтимоли ошиб боради. Шунинг учун ҳар бир фуқаро шахсий эҳтиёт чораларини кўриши жуда муҳим.
Об-ҳаво таҳлилларига кўра, бутун Ўзбекистон ҳудудида ёғингарчилик кутилмаяпти. Лекин баъзи минтақаларда шамол кучайиши мумкин — унинг тезлиги 13–18 м/с гача етиши мумкин. Бу эса чанг-тўзонли ҳолатларни ҳам келтириб чиқариши эҳтимолини оширади.
Пойтахт Тошкентда ҳам асосан кам булутли об-ҳаво сақланиши кутиляпти. Ҳеч қандай ёмғир ёки совуқлик белгиланмаган. Кечаси ҳарорат +23...+26 даражада, кундузи эса 21–23 июль оралиғида +40...+42 даража бўлиши кутилаяпти. 24–25 июл кунлари эса кундузги ҳарорат бир оз пасайиб, +38...+40 даража атрофида бўлади.
Иқлимшунослар ва шифокорлар бу кунларда тўғридан-тўғри қуёш остида узоқ вақт қолмасликни, ортиқча жисмоний фаолликдан воз кечишни, ҳаво ичида салқин жойларда танаффус қилишни, суюқликни доимий равишда истеъмол қилишни тавсия қилишмоқда.
Бу оғир иқлим шароити ҳали яна бир неча кун давом этиши мумкин. Шу сабабли барчани эҳтиёткорликка ва ўзини сақлашга чақириб қоламиз. Иссиқдан ҳимояланиш – бу нафақат ўзингизни, балки яқинларингизни ҳам асраш демакдир.