Супертурнирга йўл: Жавоҳир Синдаров катта финалда иштирок этади
Ўзбекистон шахмат спортчи Жавоҳир Синдаровнинг янги зафарини катта мамнуният билан қарши олмоқда. Саралаш босқичларида кучли рақиблар билан баҳслашган Жавоҳир EWC финалига йўлланма олди. Энди у супертурнирда, 1,5 миллион долларлик мукофот жамғармаси учун курашда, Нодирбек Абдусатторов ва дунёнинг энг нуфузли шахматчиларидан бири Магнус Карлсен билан бир сафга чиқади.
Синдаров учун йўл осон кечмади. Саралашнинг ҳал қилувчи босқичида у америкалик машҳур шахматчи Ҳанс Ниеманнга қарши огоҳлик ва ирода билан тўлиқ кураш олиб борди. Энг жиддий баҳс — армагеддонда Жавоҳир ўз устунлигини намоён қилди ва ғалаба қозонди. Бу натижа нафақат шахсий, балки мамлакатимиз шахмат тарихи учун ҳам катта аҳамиятга эга.
29 июл куни Саудия Арабистонининг Риёд шаҳрида старт оладиган супертурнирда энди Ўзбекистоннинг икки энг юқори рейтингли шахматчиси — Жавоҳир Синдаров ва Нодирбек Абдусатторов биргаликда иштирок этади. Бу йирик мусобақа нафақат катта мукофот жамғармаси, балки дунё эътиборини жалб қилган интеллектуал майдон ҳисобланади.
Ўзбекистон шахмат жамоаси ва ишқибозлари мазкур муваффақиятни катта қувонч билан кутиб олмоқда. Жавоҳир Синдаров ва Нодирбек Абдусатторовга асосий финалда омад ва ғалаба тилаймиз. Янги тарихий саҳифалар ёзилишига барчамиз умид билдирамиз!