Қозоғистон раҳбарига Туркиянинг олий мукофоти топширилди

Қозоғистон президенти Қосим-Жўмарт Тўқаев Туркия Республикасининг энг олий давлат ордени – “Devlet Nişanı” билан тақдирланди. Оқўрда матбуот хизмати маълумотига кўра, тантанали маросим Анқара шаҳрида ўтказилди ва мукофотни Туркия президенти Ражаб Тоййиб Эрдўғон шахсан топширди.

Туркия президенти ўз нутқида Тўқаевнинг давлатлараро муносабатларга қўшган улкан ҳиссаси, унинг конструктив ва оқилона раҳбарлиги натижасида Қозоғистон минтақада тинчлик ва барқарорлик марказига айланганини алоҳида эътироф этди. Эрдўғон, шунингдек, Қозоғистоннинг Туркий давлатлар ташкилотига қўшган ҳиссасини юқори баҳолади ва “Сиз Туркия ва турк халқига доимо яқинлик ва дўстлик кўрсатдингиз. Шу муносабат билан сизга мамлакатимизнинг энг олий мукофотини топшириш мен учун катта шараф”, дея таъкидлади.

Тўқаев эса ўз сўзида бундай эътирофни нафақат шахсан ўзига, балки бутун қозоқ халқига бўлган алоҳида ҳурмат ва ишонч деб қабул қилишини билдирди. “Devlet Nişanı” ордени дўстлик ва биродарлик рамзи эканини, бу қадрлашни қардош халқлар ўртасидаги мустаҳкам алоқалар, умумий тарих ва маданий қадриятлар учун муҳим қадам сифатида баҳолашини билдирди.

Қозоғистон раҳбари ўз нутқида: “Ушбу юксак мукофот Туркиянинг бутун қозоқ халқига бўлган самимий ҳурмати ва дўстона муносабатларининг ёрқин кўриниши. Бу қадрлаш халқларимиз ўртасидаги узвий дўстлик ва стратегик ҳамкорликнинг мустаҳкам пойдеворига айланади”, дея таъкидлади.

Таъкидлаш жоиз, Тўқаев одатда миллий ва халқаро мукофотларни қабул қилишдан бош тортган бўлса-да, бу орденни дўстлик рамзи сифатида қабул қилди. Бу воқеа қозоқ-турк муносабатлари ва минтақадаги ҳамкорликни янада мустаҳкамлашда муҳим воқелик бўлди.

Сиёсий таҳлилчилар ушбу воқеани тарихий аҳамиятга эга деб баҳолашмоқда. Туркия ва Қозоғистон муносабатлари янги босқичга кўтарилди ва бу қадрлаш икки давлат ўртасидаги стратегик ҳамкорлик ва дўстлик ришталарини янада мустаҳкамлайди.