Қазақстандық компания Таиландтан әкелінген медициналық қолғапты отандық өнім деп сатқан
Жоғары аудиторлық палата KazMedProm ЖШС-ға қатысты жағдайды түсіндірді. Бұл компания - Қазақстандағы медициналық қолғап өндірушілердің бірі, - деп хабарлайды Tengrinews.kz тілшісі.
Аудит барысында шетелдік өнім отандық өнім ретінде сатылғаны анықталған. 2024 жылы KazMedProm ЖШС отандық өндіруші мәртебесін пайдаланып, "СҚ-Фармацияға" жалпы сомасы 8,1 млрд теңгеге 63 млн жұп медициналық қолғап жеткізген. Алайда жеткізілген тауардың көлемі мен сипаттамасы дәл сол кезеңде компания Таиландтан сатып алған қолғап партиясымен толық сәйкес келген.
"Кедендік декларация олардың сырттан әкелінгенін растайды, ал жеткізу мерзімдері "СҚ-Фармацияға" жөнелтілген күндермен сәйкес. Аудиторлар бұл жағдайда импорттық өнім отандық өнім ретінде ұсынылған деген тұжырымға келді. Сонымен қатар, медициналық өнімдер бағасы да негізсіз жоғары екені анықталды. KazMedProm Panagloves диагностикалық латекс қолғаптарының жұбын 98 теңгеден сатқан, ал нарықта олардың құны шамамен 40 теңге тұрады. Соның салдарынан мемлекет 5,3 млрд теңге артық төлеген", - деп жазылған хабарламада.
2025 жылғы 27 мамырда осы аудит материалдары Бас прокуратураға жолданған. 18 шілдеде Бас прокуратура бұл материалдарды процессуалдық шешім қабылдау үшін Қаржылық мониторинг агенттігіне жіберді. Сондай-ақ, 22 мамырда Шымкент қаласының прокуратурасы компания қызметіне тексеріс тағайындап, оны 27 маусымда аяқтаған.
Қалалық прокуратураның тексеруі нәтижесінде KazMedProm ЖШС жылына шамамен 17 млн жұп қолғап өндіретіні анықталды. Шамамен тағы 50 млн жұп қолғап Таиландтан in bulk форматында әкелінетін өнімнен дайындалады. In bulk өнім - жай ғана қаптарға салынған қолғаптар. Мұндай өнімнен қолғап жасау процесі оларды жуу, кептіру, дезинфекциялау және қаптаудан тұрады. Шымкент қаласының прокуратурасы бұл әрекетті қайта өңдеу деп бағалап, қылмыс белгілері жоқ деп таныған.
"Алайда мұндай өңдеу жеткілікті деп саналмайды, себебі бұл жағдайда тауар номенклатурасының коды өзгермейді (аталған жағдайда өзгермеген). Демек бұл іс жүзінде өндіріс болып саналмайды. Өнімді мемлекетке нарықтағыдан едәуір жоғары бағамен өткізу дерегі де тіркелген", - деді аудиторлар.
Сілтемесіз жаңалық оқисыз ба? Онда Telegram желісінде парақшамызға тіркеліңіз!