Мектептер жаңартылуда. Облыста бес білім беру ұйымында күрделі жөндеу жұмыстары жүргізілуде
Тараз қаласында бірден бірнеше мектепте ауқымды жөндеу жұмыстары басталды. Қазір №25 орта мектепте күрделі жөндеу жүргізіліп жатыр. Жаңарту жұмыстары қашан аяқталады және жаңа оқу жылынан бастап оқушылар мен мұғалімдерді қандай өзгерістер күтіп тұр?
Қарасу шағын ауданында орналасқан мектеп ғимараты 1975 жылы салынған. Елу жылға жуық пайдалану мерзімінде мұнда бірде-бір рет күрделі жөндеу жүргізілмеген. Айта кетейік, бұл білім беру нысаны ауқымды – жалпы ауданы 4000 шаршы метрден асады. Ғимаратта 630 оқушыға арналған мектептен бөлек, балабақшаға арналған мини-орталық пен мүмкіндігі шектеулі балаларға арналған түзету орталығы орналасқан.
Жалпы құрылыс жұмыстарын «Тұлпар строй сервис» жауапкершілігі шектеулі серіктестігі жүргізуде. Құрылыс-монтаж жұмыстары 17 сәуірде басталған. Келісімшарт бойынша жобаны жүзеге асыруға 10 ай уақыт берілген – яғни, келер жылдың 10 ақпанына дейін аяқталуы тиіс. Алайда мердігер белгіленген мерзімнен бұрын аяқтауды көздеп отыр. Жаңа оқу жылын оқушылар жаңарған мектепте бастау үшін жөндеу жұмыстарын 1 қыркүйекке дейін бітіру жоспарланған.
– Қазіргі таңда ғимараттағы құрылыс-монтаж жұмыстарының 80 пайызы аяқталды, – деді «Тұлпар строй сервис» ЖШС директоры Ратбек Серікбаев. – Атап айтқанда, керамогранит төсеу мен аспалы төбелерді орнату жұмыстары тәмамдалды. Сыртқы инженерлік желілер – жылу, су құбыры және кәріз жүйесі 100 пайыз аяқталды.
Мердігердің айтуынша, мектепте жылыту жүйесі, терезелер мен есіктер толықтай жаңартылуда. Сондай-ақ, мектеп аумағын абаттандыруға да ерекше назар аударылуда: жаңа тас төселіп, мектеп стадионы ретке келтіріліп жатыр.
– Келісімшарт бойынша жұмыстардың жалпы құны 833 миллион теңгені құрайды, – деп нақтылады Рәтбек Серікбаев. – Оның шамамен 790 миллионы құрылыс-монтаж жұмыстарына, ал 27 миллионы жабдықтарға бағытталған. Бұл – асханаға арналған техника мен оқу шеберханаларына арналған токарь және бұрғылау станоктары. Қазіргі уақытта нысанда 70 жұмысшы мен төрт арнайы техника жұмылдырылған. Олар аула абаттандырумен айналысып жатыр.
№25 мектеп – биыл күрделі жөндеу жүргізіліп жатқан жалғыз мектеп емес. Қалалық білім бөлімінің мәліметінше, жаңғырту тағы төрт оқу орнын қамтиды.
– Биыл бес мектеп ғимаратына күрделі жөндеу жүргізу жоспарланған, – деді Тараз қаласы әкімдігінің білім бөлімі инженері Әлішер Жақып. – Бұл тізімге Әлихан Бөкейханов атындағы №1 гимназия, №13, №25 және №54 орта мектептер, сондай-ақ Бауыржан Момышұлы атындағы №45 қазақ классикалық гимназиясы кіреді. Осы нысандар бойынша жалпы қаржыландыру көлемі шамамен 4,5 миллиард теңгені құрайды.
Ә. Жақыптың айтуынша, құрылысшылар белгіленген мерзімге үлгеру үшін қарқынды жұмыс істеуде. Мысалы, №1 гимназияда құрылыс-монтаж жұмыстары 1 маусымда басталып, алты айға созылады. №13 мектептегі жөндеу жұмыстары 19 маусымда басталып, төрт айға жалғасады. Аяқталуы 19 қазанға жоспарланған.
– №45 мектепте бастауыш корпус бойынша жұмыстардың 37 пайызы, негізгі корпус бойынша 41 пайызы орындалды. Екінші корпусты 1 желтоқсанға дейін аяқтауды жоспарлап отырмыз, – деді Әлішер Жақып. – Ал №54 мектеп бойынша қазір келісімшарт рәсімделіп жатыр, алдағы күндері жұмыс басталады. Оған төрт ай қажет болады.
Мектептерді жаңарту – бұл жай ғана әдемі плитка мен жаңа терезелер емес. Бұл – ең алдымен оқушылардың денсаулығы мен қауіпсіздігі, сондай-ақ мұғалімдердің жайлы еңбек жағдайы. Заманауи әрі сапалы білім беру ортасы – жоғары үлгерім мен ұжымдағы жағымды ахуалдың кепілі.
Сообщение Мектептер жаңартылуда. Облыста бес білім беру ұйымында күрделі жөндеу жұмыстары жүргізілуде появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.