ტრამპის სპეციალური წარგზავნილი ოთხშაბათს პუტინს შეხვდება მოსკოვში
აშშ-ის პრეზიდენტ დონალდ ტრამპის სპეციალური წარმომადგენელი სტივ უიტკოფი 6 აგვისტოს მოსკოვში რუსეთის პრეზიდენტ ვლადიმირ პუტინს შეხვდება. ეს მოხდება ტრამპის მიერ მოსკოვისთვის წარდგენილი ულტიმატუმის ვადის ამოწურვამდე ერთი დღით ადრე. ვიზიტი დაადასტურეს Reuters-მა და AFP-მ.
ტრამპმა მოსკოვს მოსთხოვა, რომ 8 აგვისტომდე დადოს უკრაინასთან ცეცხლის შეწყვეტის შესახებ შეთანხმება. წინააღმდეგ შემთხვევაში ის რუსეთიდან და მისი სავაჭრო პარტნიორებიდან აშშ-ში იმპორტირებული საქონლის 100%-იანი დაბეგვრით იმუქრება. კერძოდ, აღინიშნა, რომ მეორადი სანქციები შეიძლება ემუქრებოდეს ინდოეთს და ჩინეთს.
სამშაბათს Financial Times-მა გაავრცელა ინფორმაცია, რომ ვაშინგტონმა შესაძლოა ულტიმატუმის ვადის ამოწურვის შემდეგ რუსული ტანკერების ფლოტის წინააღმდეგ ახალი სანქციები დააწესოს.
მოსკოვზე ზეწოლის შესაძლო ზომებს შორის ტრამპის ადმინისტრაციამ შეიძლება განიხილოს უკრაინისთვის ახალი ტიპის იარაღის მიწოდება, მათ შორის Tomahawk-ის ტიპის ფრთოსანი რაკეტებისა, როგორც ადრე იუწყებოდნენ ამერიკული მედიასაშუალებები. ეს ოფიციალურად არ დადასტურებულა.
Reuters-მა სამშაბათს გაავრცელა ინფორმაცია, რომ კრემლი არ არის მზად უკრაინაში ბრძოლის შესაჩერებლად. გამოცემა ამტკიცებს, რომ მოსკოვიმომდევნო თვეებში ელის უკრაინის ფრონტის კოლაფსს. კომპრომისის სახით კრემლმა შესაძლოა ვაშინგტონს შესთავაზოს უკრაინასთან „საჰაერო ზავის“ დადება და უარი თქვას რაკეტებითა და დრონებით ზურგის წინააღმდეგ დარტყმებზე, იუწყება Bloomberg-ი.
ვაშინგტონი რუსეთისა და უკრაინისგან უპირობო ცეცხლის შეწყვეტას ითხოვს. კიევი მაისიდან ამტკიცებს, რომ ამისთვის მზადაა. მოსკოვი ზავისთვის აყენებს დამატებით პირობებს, როგორიცაა უკრაინისთვის იარაღის მიწოდების შეჩერება.
ტრამპმა სამშაბათს ჟურნალისტებს განუცხადა, რომ სანქციების შესახებ გადაწყვეტილებას მიიღებს პუტინთან უიტკოფის შეხვედრის შემდეგ. „ბოლო ხუთი თვის განმავლობაში ხუთი ომი შევაჩერე. მინდა, რომ ეს მეექვსე იყოს“, - თქვა მან.