“Әйеліме Берденовтен хабарлама келді“: Сотталушы шенеунікке қастандық жасауының себебін айтты
6 тамыз күні басты сот отырысы айыпталушыны тергеуден басталды. Жиенбайдың айтуынша, жанжалдың себебі – жұмысқа қатысты келіспеушілік емес, қызғаныш болған.
1Бұл сөзімді халық естісін деймін. Бұл жағдайдың жұмысқа еш қатысы жоқ. Бәрі қызғаныштан шыққан", – деді Жиенбай.
Соттағы жауап алу кезінде Ернар Жиенбай өз отбасы туралы айтып, әлеуметтік желілерде тараған қауесеттерді жоққа шығаруға тырысты.
"Алтыншы сыныптан бірге оқыдық – менің адал жарым, сүйікті әйелім. Мен оны ешқашан бөтен біреумен сөйлесіп тұрғанын көрген емеспін. Ол жақсы отбасынан шыққан, тәрбиелі қыз. Әлеуметтік желілерде жазып жатқандай жеңіл мінезді емес", – деді сотталушы.
Ол үлкен ұлының аутизммен ауыратынын айтты. Ерлі-зайыптылар дәл осындай диагнозы бар бала тәрбиелеп отырған отбасымен бір көшеде тұрған. Жиенбайдың айтуынша, бұл отбасы Руслан Берденовтың туыстары болған және әйелі олармен жиі араласып дамыту сабақтарына бірге барған.
"Әйелім Берденовпен дастархандас болған. Сол жерлерде "қара касса" деген ойын ойнаған", – деді айыпталушы.
Жиенбайдың айтуынша біршама уақыттан кейін , әйелінің телефонына Руслан Берденовтен хабарлама келген.
"Әйелімнің телефонына қарасам, Руслан Берденов оған лайк басып, "Сен әдемісің" деп жазған. Мен бұдан артық ештеңе ойлаған жоқпын. Ондай сөздерді мен де әпкелеріме айтам", – деді ол.
Сотталушының айтуынша, болжалды қастандық жасалардан бір күн бұрын ол Берденовке қабылдауға бармақ болған. Әйелінен киімдерін дайындап қоюын сұраған. Бірақ үйге келгенде әйелі үлгермегенін, ал көйлегінің шеті күйіп қалғанын байқаған.
"Мен асығып тұрдым. Сол кезде ол маған Руслан Берденов қалай киінетінін айта бастады. Сөйтсем, оған 5 миллион тұратын костюмдер ұнайды екен. Бұл да менің қастандық жасауға баруыма себептердің бірі болған шығар", – деді Жиенбай сотта.
Сот процесі мемлекеттік тілде, ашық түрде өтіп жатыр. Руслан Берденов сотқа қатысып жатқан жоқ. Оның өкілі Жеңіс Тыныбек жәбірленушінің емделіп жатқанын айтты. Сот залында айыпталушының әйелі де бар.
Сілтемесіз жаңалық оқисыз ба? Онда Telegram желісінде парақшамызға тіркеліңіз!